熱門:

2017年3月29日

麥狄文 金融街密語

駿傑做好表面功夫獲放生

停咗牌一個月嘅創仔駿傑集團(08188)噚日終於獲「放生」,公司按證監會要求,控股股東將名下5%股份售予455名承配人,每股作價跟之前上市價0.54元相同,較罰停賽前3.47元大幅折讓85%。完成配股之後,噚日復牌幾乎打回原形,一度低見0.53元,收市報0.61元。以上市價拎咗貨嘅小股東,如果第一日上市冇走過,應該都冇,紙上富貴完又係南柯一夢。

至於喺復牌之前先認購大股東嗰5%貨嗰455個承配人,按噚日收市價計,家陣仲有一成左右利潤,斷估可以自由買賣。其實駿傑為乜畀證監罰停賽,之前阿Man都有講過,唔少行家都覺得駿傑算黑仔。皆因創仔「圍飛作歹」唔係最近嘅事,偏偏佢上市當日喪升五倍,觸動咗證監個「玻璃心」,認為駿傑太過唔畀面,都已經講到明要嚴打「圍飛作歹」,畀得你上市就要規規矩矩。夠薑半日升五倍,證監覺得被剃眼眉,所以要畀紅牌佢出場。

為求復牌「另類圍飛」

其實講開又講,之前駿傑上市,都係沿用一般創仔嘅做法,可惜當時證監開始着手整頓,皆因彭博去年底曾經發文,指全球20隻首日大升股份中,香港創仔佔18隻,可惜之後又大跌,形容香港為「插水股之都」。

呢篇報道一出,港股負面形象已進入國際視野,證監就算想側側膊當睇唔到都唔得。只不過駿傑首日掛牌,確係有批散戶入咗場,無啦啦掛咗半日停牌,復牌條件係要再發新股滿足證監分散貨源嘅要求,即使沒有違規,但對小投資者同散戶唔多公平。

睇番中央結算資料顯示,駿傑上市時持倉券商本來只有13間,但去到上星期五,突然變咗83間,其中潮商證券跟結好證券兩個大倉冇咗影;而經辦人太平基業、分銷商中辰證券,以及統一證券嘅持倉量,喺一夜之間大減。股份打散至72間新增券商手上,當中不乏活躍於創業板的券商,如樹熊、鼎成、貝格隆及太陽國際等。再睇仔細啲,當中有21間行只持有一手(4000股),一中證券更持有不足一手嘅3100股碎股。

睇到呢個持倉狀況,阿Man忍唔住笑咗。所謂嘅符合證監要求,增加公眾持股比例,咪又係表面功夫,只不過係「另類圍飛」,等駿傑持倉更為分散,目的只係尋求復牌。其實呢單嘢證監會引用《證券及期貨條例》8.1條勒令駿傑紅牌出場,個案已提升至證監會董事局層面審理,等於必須以法律途徑解決。至於董事會方面,認為今次單嘢好似玩大咗少少,所以喺駿傑做咗一輪表面功夫之後,亦都畀佢復牌,免得雙方最終要對簿公堂。

不過經過駿傑呢一役,無論係創仔定主板,呢期都聽唔到有人再夠膽話「圍咗隻嘢嚟搞」,大部分都話要堅去sell投資者,所以呢期搞IPO嗰班公關,真係忙到一頭煙,皆因要幫手出力sell客,搞好路演等等,唔係之前咁簡單淨係搞吓發布會就搞掂。

麥狄文(徐狄怡,證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads