《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2017年1月18日
記得三色台無幾耐之前做過一套講公關嘅劇，內容都係離唔開一個醒目公關點樣向上爬，同埋做公關嘅辛酸血淚史咁上下……最搞鬼係呢套劇嘅宣傳片一出街之後，阿Man唔少做開公關嘅老友鬧到飛起，話條片誤導觀眾，令人以為公關好易做兼搵到大把錢。其實做公關唔容易，雖未至於係厭惡性工作，但實情都幾惡啃，亦唔係想像中搵咁多錢。而且公關都有好多種，好似三色台套劇嗰類做品牌同event嘅公關，工作性質同財經公關都幾大分別。
兩折接job為求簽長約
財經公關最重要工作，就係幫上市公司同投資者建立良好關係，協助公司成功集資，無論係首次招股IPO，抑或上市後配股集資，公關都要幫公司搞路演（road show）推介吓公司，更新公司最新發展資料同狀況，吸引有興趣投資者。除咗一次性嘅公關服務，好似搞路演同記招，又或者係一年一度嘅業績發布會等，財經公關都希望上市公司會用佢哋提供嘅retaining services（月費服務），藉此跟上市公司建立緊密合作關係，維持良好溝通。與此同時，財經公關亦每月都有一筆固定而穩定嘅收入，所以一般財經公關都幾重視retaining services。
中介人疑食幾家茶禮
唔少客仔就係捉住呢一點，盡情搵啲財經公關笨，每每用同公司簽retaining合約作為條件，要求幫襯單一公關服務時，提供大額折扣，甚至只肯付出低過半價嘅服務費，盡情剝削啲公關公司。阿Man聽過某個財經公關老友吐苦水，曾經試過有一個客，話要先試試老友間公司啲財經公關服務如何，公司去到乜嘢水準，夠唔夠專業，可以先畀公司搞一個單一event。跟手嗰間公司就以簽長約，即係retaining services作為交換條件，要求個單一event畀個試做價，只肯兩折價錢找數。老友一心希望同呢個客建立長期合作關係，心諗蝕底一次半次冇問題，就以兩折價錢接咗個job做，明知被搵笨亦繼續做半義工。
誰知嗰一次搞掂之後，個客就一路採取拖字訣，一直以大老闆未有時間，又或者老闆仲考慮緊為由，暫時未批budget作公關費等，一大堆藉口搬出嚟，迴避同我老友間財經公關公司簽長約，足足一年過去仍未肯簽。阿Man聽完即問老友邊間公司耍太極咁了得，老友守口如瓶未有爆響口，阿Man亦無謂苦苦追問。不過老友亦補充咗一句，好多時上市公司搵啲公關笨，大老闆係未必知情，尤其係基地喺內地嘅中資公司，老闆好多時間唔喺香港，更加易被蒙在鼓裏。老友話最唔順氣係好多時唔關老闆甚至上市公司嘅事，唔少中介人為咗食多兩家公關嘅茶禮，就從中作梗唔畀上市公司用retaining services。每當公司有公關服務需要時，呢啲中介人就會蒲頭，搵唔同公關、製作公司報價，邊間有着數用邊間，講到着數喎……當然係中介人有幾銀落袋嗰種着數啦！
麥狄文（徐狄怡．證監會持牌人）
訂戶登入
| 下一篇： | 馬雲沒有錯 彼得林治也沒有 |
| 上一篇： | 50天線為減磅訊號 |
