《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2017年1月5日
2017年第一單料，估唔到又係同殼股有關，睇嚟今年買賣殼呢個熱潮會繼續；至於大家如何尋找搭順風車機會，真係要睇住《信報》各專欄同名家嘅分析。自從大陸去年重啟IPO之後，曾經唔少「啤殼集團」腳震震，擔心內地豪客金主，減少對殼股需求，咁嗰班「啤殼集團」分分鐘血本無歸。
啤殼生意 長做長有
阿Man 對於香港股市買賣殼活動睇法仍然係正面，皆因香港股市嘅上市公司，喺內地資金眼中不單只係一個集資平台，對內地資金嚟講，港股好比一個防止手持人仔貶值嘅避風港，收購香港上市公司（買殼），亦係資金可以堂堂正正走出國外嘅好方法。既然呢個係資金「着草」工具，自然有價有市。
之前講到「啤殼集團」曾經擔心內地重啟IPO會搶生意，減少內地資金對香港股市殼股需求，但舊年買賣殼嘅次數有增無減；而港交所（00388）只顧吹噓香港成為全球最大集資額嘅IPO市場，一直重量唔重質，搞到啤殼上市公司數量一直增加，公司質素則持續下降。
唔少創業板新丁，上市首日股價即暴升，升幅較招股價數以十倍，甚至百倍計算，明眼人都知係因背後有人「圍飛作歹」，冇街貨，股價自然姿勢隨佢擺。奇怪嘅係，呢批一直被視為啤殼等賣盤嘅創仔，股價升咁多令市值谷到幾十億甚至過百億，市值咁大又如何脫手。原來一切係同之前阿Man講過嘅預售「殼花」有關。
皆因唔少「殼花」嘅買家，其業務係有番咁上下份量嘅內地企業，可能其資產值都以數十億元計，既然有殼花在手，喺貨源仍然歸邊情況下，要打造數以十億元計市值嘅上市公司容易得多，自然預早做定前期工作。喺阿Man手上就有一份疑似「殼花」嘅名單，佢哋嘅共通點都係創仔，但掛牌後市值即谷大至20億元以上，而股價一直高踞不下，市值維持咁上下「晒士」，仲要都係近呢一兩年上市，當中包括雲裳衣（08127）、陸慶娛樂（08052）、泰錦控股（08321），而其中最誇張嘅，莫過於大家較為熟悉嘅「翠如BB」聯旺（08217）；公司上市冇耐，市值已炒到過百億，近日市值更谷大至200億以上。背後若非有心人發功，區區一隻創仔又何德何能過百億市值。
貨源歸邊 預售「殼花」
阿Man估計呢堆創仔公司，早已名花有主，未上市已經搵到新金主買殼，上市只係等時間，若然市值谷到咁大，估計新主來頭亦唔嘢少，分分鐘成功借殼之後，公司好快轉主板上市。至於呢啲殼花可以賣到幾多錢，真係要視乎買家乜頭乜路。內地A股亦有借殼上市例子，曾經有公司以作價百億賣殼，皆因買方係重量級龍頭巨企。試諗吓，如果360又或者係恒大地產（03333）， 甚至順豐呢種級別嘅行業龍頭借殼，100億嘅殼價，簡直係濕濕碎。
麥狄文（徐狄怡．證監會持牌人）
訂戶登入
| 下一篇： | 在家靠淘寶 出門靠微信 |
| 上一篇： | 基金業中伏 2016成災難年 |
