《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年12月14日
新一屆特首選舉委員會界別分組選舉已圓滿結束，而我哋金融服務界組別一如往常，都係建制派勢力勝出。今屆票王由「細詹」奪得，阿Man又唔覺得太意外，皆因喺立法會功能組別選舉時，Ricky最後一日先至報名參選，老豆亦同時參選，唔得閒幫囝囝拉票，但Ricky結果都攞到150票，得票率近三成。相對獲中字派動員力保嘅「峰哥」，做咗四年爭取連任都只係攞到261票，得票率僅僅過五成，「細詹」已經算有幾好成績。
傳阿爺有特別任務
阿Man八到Ricky能成為今次特首選委金融服務界票王，除咗佢相當落力拜票之外，有業界人士話，想有啲唔係凡事都同阿爺say yes，兼有獨立思考嘅開明建制派，代表自己選特首喎。不過得票亦高嘅「白頭佬」，擺明係舊派建制人，聽聞佢有任務在身，成功當選特首選委後，又要破先例出嚟再選金銀貿易場理事長，威脅現任理事長地位。
聽番班金佬講，現任理事長唔多得民心，好似今次特首選委界別分組選舉，本來代表金佬嘅已經唔多，而選委會係多議席多票制，選民可以一人投好多張票，但係「金銀長」都竟然都落選，而其他參選金佬都成功當選，「白頭佬」更加高票當選，可見「金銀長」真係唔太得民心，兩者高下立見。
「白頭佬」有冇機會坐番金銀貿易場一哥嘅位置仍係未知數，但係「金銀長」冇得玩應無疑問，皆因一班元老同會員都唔多like佢，擺明要「逼宮」令佢冇得留低。記得上屆理事長選舉，「金銀長」係高票當選，事隔一年因乜事盡失民心，呢層阿Man不得而知。
反而「白頭佬」今次俾班元老推舉出嚟再選理事長，成件事十足普京二度成為國家元首咁傳奇，相信金銀業中係前無古人。有口痕友話「白頭佬」眾所周知係阿爺嘅人，有幸再坐上金銀貿易場一哥寶座係阿爺意思，唔排除有特別任務在身，幫阿爺控制住金融業界。阿Man唔會諗得咁複雜，況且金融服務業一向都係由建制派話事，若然今次呢個係唱反調嘅民主派，阿Man先會覺得奇怪。無論邊一個界別都好，業界人士認為邊個可以為佢哋謀福祉，咪搵邊個做大佬，道理就係咁簡單。
麥狄文（徐狄怡．證監會持牌人）
訂戶登入
| 下一篇： | 是見風使舵 非鋤強扶弱 |
| 上一篇： | 不宜輕率看淡 |
