2016年12月9日
12月8日,周四。昨天講開股民愛追表現,指的乃眼見別人在升市中大賺特賺,自己卻一無所得,個心唔舒服,唔炒埋一份勢係假。芬佬有芬佬驚跑輸對手,年尾花紅無着落之餘,分分鐘連份工都凍過水;老散有老散慌死執輸,㷫合合照追可也。
在鐘擺的另一端,無限擴大恐慌,樓梯未響便當正殺到埋身之輩,市場上同樣多如牛毛,債市近日的拋售潮即為一例。早幾日在報章上看到一個資產管理廣告,sell的是債券類投資產品,但重點推介短期和浮息工具,標榜加息冇有怕。
債民捨長取短
不愧吃這行飯,基金業市場觸覺一流,投資者喜歡什麼、害怕什麼,總能為他們「度身訂造」順應潮流的理財產品,唔到你唔服。
請勿誤會,老畢絕無叫人與大勢對着幹之意,閣下是否有興趣人棄我取逆向而行,吸納年期較長的債券,跟在下可沒半點關係。我只想說,淡定有錢剩,High過龍或驚過龍,都很易令人把注意力放在錯誤的地方,該睇到的視而不見,不應過慮的卻杞人憂天。
與在本港報章落廣告的資產管理公司銷售對象一樣,美國散戶近期也有追捧短期和浮息債券產品的趨勢,資金大舉流出長債ETF,轉投對利率風險敏感度較低的短債或浮息債券基金。
債當股炒物極必反
根據彭博資料,iShares Short Maturity Bond ETF、Floating Rate Bond ETF、SPDR Bloomberg Barclays Short Term High Yield Bond ETF、 PowerShares Senior Loan Portfolio,以及Vanguard Short-Term Corporate Bond ETF,五隻最受歡迎的同類ETF本周首個交易日(周一)合共錄得4億美元資金淨流入,為當中推出日子最短產品面世以來,資金流入最可觀的一天。
顧名思義,上述ETF集中持有短期或浮息債券, 投資者對「息魔」有多憂慮,從資金流向可見一二。
主力持有20年以上美國長債的iShares Barclays 20+ Year Treasury Bond ETF(代號TLT),7月見頂以來價格跌足16%,債券唔同股票,咁插法,揸長債咪話唔得人驚。不過,到底是通脹、息口真的會像市場想像般上得那麼快,抑或今年中個個係又負利率唔係又負利率,債券當股票炒,終於物極必反?
驚加息驚成咁,投資者彷彿從未見過利率上升。這也難怪,零息環境持續了將近十年,記不起或不知道息口上升怎麼回事,有乜出奇?在老畢還是「小朋友」的時候,借錢買樓或做生意,息率動輒雙位數。即使十多二十年前,供樓講緊嘅仲係P+,邊有依家按息鬥平鬥賤爭崩頭咁盞鬼。
無錯,世界係唔同咗,習慣零息咁耐,對加息感到陌生唔難理解,但定息工具忌通脹多於利率風險引發的價格波動,債券利息收入產生的投資回報若追不上通脹,對退休計劃等長遠部署影響唔講得笑。
Talk real, get real!
買股票好少人着眼實質(real,扣除通脹)回報,但持有甚至依賴債券一類定息工具,卻唔到你唔talk real, get real。
短短幾個月前,投資者債當股炒不特止,仲要問人借錢嗰個有息收,借錢畀人嗰位到期反而收唔足本金。
只要有利可圖,人人樂於荒謬當常態,大堆理由撐負息。債市近期景象,反映的不過是世界變番正常一些而已。
放大圖片 / 顯示原圖
訂戶登入
下一篇: | 銀根續偏緊 A股無運行 |
上一篇: | 香港股市上日收市統計 |