《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年12月7日
膳源控股（01632）上市6個交易日，由招股價2元勁升至噚日收市14.5元，昨單日飆近43%，市值由4億急急膨脹至29億元，市值仲大過翠華（01314）嘅18.4億元，估唔到呢碗「越南河」，仲勁過中港兩地人都鍾意食嘅「脆脆豬」。
膳源爆升 啤殼味濃
膳源主要經營越式餐廳越棧，招股價為2元，若散戶於IPO時抽得一手2000股，仲持貨到呢一刻，賬面已勁賺25080元，真係天降橫財。睇番膳源發行股數只有2億股，公司最初計劃以每股1.67元至2.15元發行約5000萬股，10%係本地IPO，雖然有15%超額配股權，但睇吓啲數字就知股數唔多，集資額唔夠1個億，「啤殼」味頗濃。
膳源為香港東南亞全服務式餐廳業務22間越棧品牌餐廳，包括主要品牌越棧，以及子品牌包括越鄉和越悅。集資所得筆錢係咁用：約61.5%將用於擴闊菜式、約23.3%用於維持及擴充越棧品牌餐廳、約3.3%用作提升及擴充食品加工中心、約2.7%以提升資訊科技系統、約1.5%提升品牌形象及知名度，以及7.7%用於營運資金及一般企業用途。
膳源喺本港東南亞全服務式餐廳市場的佔有率為9%，排第一，地域分布方面，分店覆蓋本港18區其中嘅14區，分布已算唔錯。今時今日做飲食，最大開支一定係租金同工資。「越南河」嘅店全部都係租賃物業，一旦業主玩嘢都咪話唔頭痕。除了租金成本，勞工成本是另一大開支，餐廳員工主要為低技術工種，較受最低工資調整影響。另外，本地飲食業競爭刺激，膳源曾開設4家菊花園茶餐廳，想撈過界同「脆脆豬」鬥，最終結業收場，反映競爭程度和管理層能力。
其實純以基本因素去分析，市場內經營連鎖餐廳嘅選擇仍有翠華、創業板嘅皇璽餐飲（08300），傳統啲有大快活（00052）同大家樂（00341），要揀的話「越南河」可能都要排吓隊。不過「越南河」有理冇理先落鑊，優點係貨少易控制，幾日由2元升到14元樓上，貨源歸邊自然鑊氣夠。
不過，缸邊友話隻股呢幾日炒上嚟，唔單止莊家貢獻大，同樣有炒家入場博，皆因年底基金陸續放假例靜，既然無其他主題好炒，一於玩鬥儍遊戲，乜因素都唔睇，肯入場就係贏家，喪炒新股搵食。就以膳源為例，一碗越南河畀盡佢咪賣七八十蚊，但市值竟然谷到近30億元，試問要賣幾多碗越南河先夠維皮，情況同當年「脆脆豬」喪炒至5元樓上，同樣幾十億市值，而家咪一樣受冷待，落番嚟得番唔夠20億市值。
麥狄文（徐狄怡．證監會持牌人）
訂戶登入
