深港通小心「暴動爆煲股」重現

千呼萬喚始出來嘅「深港通」，落實於下周一開通，但市場未見興奮，可能上次「滬港通」已有一次經驗，缸邊友開始明白一瞬間嘅激情，只會帶嚟短暫亢奮，之後換來股災同熔斷嘅傷痛；倒不如細水長流，咁樣先可以長玩長有。

雖然今次北水來香港玩「深港通」，相對「滬港通」已變得收斂，但人民幣貶值已成趨勢，北水對投資港股興趣仍相當濃厚。內地資金要「逃離」人民幣市場已屬公開嘅秘密，除咗利用合法同正常途徑，包括滙款、利用買保險又或者買物業及其他投資，甚或透過「地下錢莊」用自己方法將內地資金調出境外；而家多咗「深港通」，等於又多一條合法途徑北水南調。

除咗上述因素外，今次「深港通」令內地炒家興趣大增，因為可供投資港股，唔再局限於重磅股，仲加入咗唔少市值唔夠100億嘅中小型股。有內地基金及私募基金、專業炒家甚至炒股大媽都已摩拳擦掌，希望能夠喺港股搵番舊年喺股災輸咗嗰一筆。

佢哋又瞄準住新增嗰102隻「深港通」股份，當中嘅「新經濟概念股」，喺香港上市嘅股份市盈率只有十幾倍甚至得單位數不足十倍，較深圳股市同類股份市盈率40至60倍，要爆炒升番一兩個開冇難度。

至於「新經濟概念股」係乜東東，即係醫療網上化、家電銷售進入實體店與虛擬店相輔相成嘅年代，而汽車則以節能為大前提，亦有加入先進無人駕駛科技；另外，「工業4.0」即係製造業電腦化、數碼化與智能化，亦係受捧概念。

不過，諗番內地炒家嘅炒股手法，確係嘆為觀止，只要嗰隻股份街貨收得七七八八，盡入佢哋自己友手中，可以將股價炒高十倍甚至廿倍或幾十倍，然後再狠狠向下派貨。呢啲暴升暴跌炒法，間接製造出爆煲妖股。去年最經典莫過於恩達集團（01480），股價由唔夠兩蚊炒到最高過百蚊，之後又急跌幾十蚊，其後股價一直喺兩蚊左右徘徊，百元股價不過係南柯一夢。

貨疏股勿沾手為妙

小心提防今次「深港通」又案件重演，盡量避開嗰啲街貨唔夠流通嘅股份，雖然有機會成為內地炒家暴炒對象，不過針無兩頭利，暴炒過後多數係爆煲收場。

缸邊友講笑話，以前香港散戶經常輸畀外資大鱷，早已習慣做點心，若然家陣炒爆煲妖股炒畀內地莊家甚至大媽，話晒都叫輸畀「自己人」。阿Man認為中國人不打中國人，唔炒暴動股又唔會死，醒目缸邊友自己睇清楚嗰102隻「深港通」股份，如有疑似暴動股，都係避之則吉。

麥狄文（徐狄怡．證監會持牌人）

下一篇：	升多跌少未轉弱 12月仍不宜看淡
上一篇：	自我實現的期待

文章：

— 麥狄文

更多...