《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年11月2日
港交所及證監會為免港股淪為「啤殼工場」，就上市監管制度進行聯合公眾諮詢，希望強化上市把關，並稱可以確保港股上市公司有一定質素。
可惜至目前為止，港交所同證監會與業界仍未就創板新股、「啤殼」等問題，提出任何具體建議。不過，今年6月初，港交所就首次公開招股（IPO）審批及申請人嘅上市資格發出指引，收緊潛在「殼股」嘅上市申請。
殼股有價有市爭崩頭
如此一來，未來潛在「殼股」數目只會有減冇加，換句話講即係殼價好難有得落，難怪最近就有主板殼以超過7億元天價成交。其實呢隻主板殼都攤咗喺度幾年，邊間公司阿Man唔開名喇。最多畀個貼士大家，係工業殼主板9字頭，心水清者應該已經有答案。
呢間公司個老闆一向唔多等錢使，隻殼一直吊高嚟賣，當殼價去到5億時叫6億，市價去到6億時，又話要加多5000萬先賣。總之多次反價，擾攘咗兩三年，卒之喺兩個月前以高過市價超過7億元成交。唔少殼主即以此價作為新指標，家陣一個稍為四正嘅主板殼，閒閒地都叫價6.5億元以上。
富臨唔憂賣 復星再給力
監管機構開到聲話要出招收緊借殼上市，有心借殼嘅企業，呢期買殼特別疏爽，殼主唔憂賣，但買家趕住買，希望喺落實執行一切堵截「走後門」制度之前，盡快完成借殼上市呢個步驟。呢幾年唔少事務律師就專科幫人搞借殼上市，收費有時仲貴過一般IPO，而收費高低視乎成單deal嘅難度，以及參與程度。阿Man收到風唔少事務律師，甚至會同「造殼者」組成聯盟，為客戶提供一條龍服務。
呢兩三年由於嚟港股借殼嘅內地企業愈來愈多，北水南流嚟香港買殼，亦令本港嘅殼股更受追捧。莫講話唔賣業務齋賣殼嘅「港殼」成為爭奪對象，成間賣盤嘅公司亦成為搶手貨。阿Man喺9月21日〈飲食股唔係全部啤嚟賣〉內提到富臨（01443）要賣盤，當時睇中富臨係復星集團，可惜復星開嘅條件太辣，最終雙方傾唔埋欄。富臨反而跟另一間內地新三板公司達成協議，目前準買家正進行盡職審查，一切無問題富臨就正式賣盤。
復星眼見富臨賣得成，所謂「瘦田無人耕，耕開有人爭」，有消息指復星喺上星期再跟富臨展開談判，可能開出令富臨可以接受嘅條件，誘使對方賣盤。雖然富臨唔係賣殼係賣盤，而潛在交易對象可能係有番咁上下知名度嘅復星，但富臨一樣擺出一副唔憂賣姿態。可見家陣呢個「孖屐」係由賣家主導，「賣殼，唔急，買殼，最緊要快。」
麥狄文（徐狄怡．證監會持牌人）
訂戶登入
| 下一篇： | 恒指調整未見底 |
| 上一篇： | 時代在變 軟硬體業臨新挑戰 |
