《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年10月12日
金嗓子（06896）股價自去年7月上市以嚟，表現唔算太突出，直至今年初忽然開始發力，股價拾級而上，升到7月底最高8.47元，股價較舊年上市招股價4.6元幾乎翻了一番。
金嗓子股價一年升咗一倍，背後發功者用心良苦，搞咁多嘢又係為咗喺市場「CAP」水，事關上市夠一年啱啱好可以再集資。金嗓子除咗喺股價上動手腳之外，公司亦好認真花時間去見投資者，公司自8月開始搞獨立投資者會議，見咗唔少本地跟中資投行，規模唔可以同鬼佬投行相提並論，據聞金嗓子都見咗十間八間行，當中亦包括其上市保薦人瑞信。
阿Man八卦到當時金嗓子管理層好坦白，最似曾曾的一種說法是，公司同所有會面投資者解釋公司有意批股集資，因為要將業務發大嚟搞，錢係唔少得，況且公司有意投放更多資金喺科研同推廣方面，須知呢兩瓣使錢一向都無譜，公司批股集資未雨綢繆亦好正常，而當時亦有行表示有意幫公司批股。
好可惜公司未成功批股，股價喺9月中慘遭大屠殺，更見埋今年新低兼穿埋招股價，期間公司曾申請停牌，並向市場解釋公司係就係有意批股，只不過尚未達成協議。以為呢則通告可以釋除市場疑慮，金嗓子阿珍姐似乎低估咗市場力量，公司通告發出以後，其股價更跌穿5元及進一步向下，直至上月底低見3.7元上市後新低。
除咗發通告之外，大股東曾勇亦真金白銀出錢增持，諗住有大股東真金白銀支持，可以穩定股價， 睇嚟無論勇哥同珍姐，都未有同其他持貨主要股東好好溝通，之後股價繼續食咗瀉藥咁跌唔停。
溝通失靈 爬頭沽貨
金嗓子股價之所以未批先冧，睇近期的盤路，好大原因係有主要股東喺公司批股之前爬頭沽貨，仲要開大折扣吸引買家，有股東搶住批舊股，其他收到風嘅股東又沽埋一份，個價有乜辦法唔冧到七彩。
睇番由9月中股價開始插水之際，三日唔埋兩日就會有啲一手幾百萬股股份M機上板，上板價通常較上日收市價折讓一成左右，照計折讓唔算太大， 無理由金嗓子股價可以喺短短兩星期之內插水近五成。阿Man喺上月曾經收過一個盤，指金嗓子有舊股批，批股價喺收市價折讓18%，點解折讓咁零丁， 皆因另有2%作為placing fee派畀中間人，即係股份本身係打八折批股，難怪股價面對咁大沽壓。今次金嗓子批股失敗，當然係公司跟主要股東溝通出咗問題，雙方欠默契，仲要有人偷步批舊股，其他公司借此為鑑，想喺市場「CAP」水，一定要計劃周詳。
徐狄怡．證監會持牌人
訂戶登入
| 下一篇： | 點解「公仔」仲未出現 |
| 上一篇： | 恒指大黑墓碑單日轉向 長和大頭肩頂危殆 |
