熱門:

2016年9月15日

方卓如 方如玉帥

互相用槍指住個頭

你有冇睇過西部牛仔片?冇?唔緊要,其實都唔關事,大部分電影都會出現一個場面,就係3個以上嘅人互相用槍指住,你想射我,我想射佢,佢想射你。呢啲僵持嘅場面司空見慣,大家唔敢輕舉妄動,氣氛緊張。到最後,大家都係放低槍當冇事發生過。

而家金融市場就係咁嘅情況,大家喺一個好微妙嘅夾縫裏面炒個不亦樂乎,但係支槍仲係互相指住,大家鬥唔掹雞,總之大家唔死就當冇事發生。但係如果邊個唔生性,一個唔覺意走火,咁就大家攬住一齊死。美股不斷創新高,全球市場繼續適應銀紙泛濫嘅新常態,將現金實物放喺籠底,將餘錢追逐似有若無嘅回報。但係美國聯儲局放風有機會加息,即時提醒大家原來仲有支槍指住個頭,先有恐慌性減持令到所有金融市場下跌。試諗吓,如果冇加息恐嚇嘅出現,香港仲炒緊內地保險公司買港股,指向二萬五千點直衝。嚇一嚇,大家驚醒而家仲係亂世,心情逆轉,大市即刻打回原形。

銀紙貶值前掃貨

究竟呢個咁危險嘅局面可以維持幾耐?觀乎加息嘅說話一出已經咁有威力,好驚呢個局面唔會頂得好耐。大家都知道命懸一線,大家都知道總有一日完結,但只要大家唔開槍,企定定係可以捱好耐。你見到全世界都用各種方法保留現金喺手,就明白大家都係等呢一日發生。

說好的大爆煲來臨嘅時候,正是財富轉移同消滅財富嘅高峰期,你要做嘅係想辦法保護自己嘅財富。呢個過程係好弔詭,而家你要設法保留現金,因為大爆煲後大部分資產都會大跌價。但大爆煲之後,銀紙又會好快唔值錢,因為太多銀紙同債務係要用通貨膨脹嚟消滅。點樣喺銀紙大貶值之前出街掃平貨,係一條你而家要諗嘅問題,較2047地契如何續租更加迫切。

慢慢諗,唔會咁快有答案,開心過節,中秋節快樂。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads