熱門:

2016年8月24日

麥狄文 金融街密語

翠華換掌櫃 望團結一心

連續兩星期睇咗本報「財圈識真假」嘅〈翠華勵志故事〉上下集,為翠華(01314)近期幾個風波而解畫,包括本來唔少缸邊友都誤會主席李遠康(康叔)係大股東,實際康叔僅持有26.3%上市公司權益,他並不完全等同翠華及翠發。

翠華派發特別股息唔係大股東等錢使,是為了與股東一起分享成果。而翠華租舖關連交易只是尊重合約精神,無刻意益自己友。

呢兩集故仔應該可以釋除市場對翠華大部分誤解,不過仍有謎團待拆解,就好似今年4月翠華CEO兼創辦人之一嘅何庭枝劈炮唔撈,表面話要搞自己嘢,內裏究竟乜因由。跟手又到大股東宣布洽商賣盤,但主席康叔又話冇呢件事,翠華賣盤即演變為羅生門。

睇牌面似係其他股東想套現「袋住先」,但康叔就想「一生一世」。呢啲都屬於有待破解嘅謎團,不過阿Man八到一單料,或者可以將所有謎團一次拆解。

搞好內部關係 業務重納正軌

話說尋日翠華宣布做咗掌櫃唔夠8個月,凳都未坐暖嘅CFO康安妮,以發展個人事業為理由請辭,而坊間最多人認同的理由,係翠華全年業績跑輸大家樂(00341)同大快活(00052),再做落去都難搞,所以選擇跳船。

不過,據阿Man在出面收嘅風,係有人搞到翠華七國咁亂,一班上大人唔多滿意,不如索性執包袱走人。

本來阿姐入翠華睇住盤數做掌櫃應問題不大, 但要幫手做管家搞埋內部監控,可能顧此失彼。據聞,有人可能係新官上任三把火,或急於求成領功, 喺監控各股東嘅時候又有意無意打小報告,令到股東之間心存芥蒂,內部團結打了折扣。如股東之間真的不齊心,或可解釋到點解何庭枝離隊,仲有集團賣盤演變成羅生門。

翠華為穩定大局,所以搵咗曾任職翠華CFO、現任內地業務首席執行官的楊東頂埋阿姐個位,直至董事局物色到合適人選填補空缺。而楊東除咗係中國業務舵手之外,仲係翠華最原始舊班底之一,希望佢可以搞番好內部團結,盡快令翠華重上正軌。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads