2016年8月17日
唔知大家仲記唔記得,之前同大家爆過料,自從「阿蟲」入主咗南豐集團以來,二小姐Vivian辭去集團董事長一職。當大家認為二小姐將放棄「當家」呢個要職退落嚟、把公司交畀「阿蟲」打理之際,原來二小姐可能只係留有一手,雖未知能否說成垂簾聽政,但幕後仍非乜都唔理。
阿Man了解過外面吹嘅風,據聞自二小姐升上神枱,改任集團顧問之後,集團內部通告、memo同email,以及唔少通訊文件,都會見到二小姐蹤影,可見對業務仍上心。
二小姐除咗解除集團職務之外,早喺今年2月底,就將旗下兩間公司包括南豐中國同南豐資源,易名為豐資源集團,英文名則由Nan Fung改為Vervain。
二小姐或是「買保險」
有報道話二小姐退休,公司改名係想擺脫守舊味道。但也有另一說法,話二小姐旗下公司改名,係因為南豐集團嘅持份者同南豐基金會嗰邊有人詐形,指二小姐自己公司用南豐個名,令人有錯覺呢兩間公司係南豐集團子公司。
既然「阿蟲」入得去幫二小姐手,當然要幫手執埋呢啲手尾,個人都未坐穩,已獻計將南豐中國同南豐資源去公司註冊處通報改名。
其實南豐中國同南豐資源呢兩間二小姐嘅私人公司,用咗南豐呢個名唔短日子,更有人稱呢兩間公司為小南豐,二小姐似乎樂於照單全收。
只不過,唔知大家仲記唔記得,二小姐一直官司纏身,由陳老太入稟告二小姐單官司,早已排期今年9月開審。
呢一場官司係之前爭產官司嘅延續,由於輸贏難料,為免拖累自己兩間公司,有人先退下第一線,跟手再改名,免得官司有乜冬瓜豆腐時,火燒連環船。
照咁講,一切動作可能都係為咗9月單官司而部署,呢個原因亦解釋到點解話退非全退,所謂退下來可能只係買個保險。
訂戶登入
下一篇: | 短線也許不壞 中線難以看好 |
上一篇: | 續守移平線上 本月高點待現 |