《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年4月27日
月初一份「巴拿馬文件」轟動全球，當中披露多個國家元首、政要以及超級富豪如何利用「避稅天堂」隱瞞財富或逃稅，一時搞到呢班大哥大姐有得震，冇得瞓，其中更有國家元首請辭，可見呢份文件牵連甚廣，威力驚人。
最近阿Man有個巴打透露香港大地主之一嘅非上市地產集團（下稱集團），做咗一啲人事調動，公司董事長辭任，升上神枱做咗名譽董事長，而喺2014年2月空降為集團行政總裁嘅前高官，則兼任董事長一職。本來呢類公司內部調職唔算乜嘢新聞， 況且自前高官空降集團後，董事長早已退下火線，日常業務早已經由前高官打理，成為集團掌舵人。
提前履新惹揣測
據聞呢份內部調職通告係上星期於公司內部發表，但奇怪係前高官兼任董事長日期好奇怪咁back day到由4月1日開始，正正係「巴拿馬文件」爆大鑊之前兩日。查實該集團早年私有化之後，唔再係上市公司，呢類咁嘅內部調職亦係平常不過嘅事，而前高官喺集團呢年幾以來，前董事長亦差不多全身而退，所謂董事長亦不過係虛名一個，公司上上下下都習以為常。唔明公司點解要煞有介事地發通告，仲要將前高官履新日期推前到4月1日。
呢一份通告惹嚟唔少揣測，有八卦公話唔排除呢次前董事長全身而退，可能同「巴拿馬文件」有關，所以要喺文件披露日期前先辭任董事長一職，並由前高官主持大局。巴拿馬文件內披露嘅公司同人物，數目最多涉及嘅正正係香港公司，作為香港頂尖級數超級富豪，亦係一直對庫房貢獻良多嘅公司，集團擁有離岸公司又有幾出奇。可能就連前董事長自己亦記唔起有幾多間離岸公司，甚至註冊喺邊一個地方，但為免惹上麻煩，今次索性辭任公司一切職務，升上神枱掛個名，咁就可以乾手淨腳。
聽聞前董事長搵前高官入公司，查實一早已部署退休，今次嘅安排可能係早有預備，只不過時間上跟「巴拿馬文件」有啲接近，咁先搞到大家諗多咗啫！
訂戶登入
| 下一篇： | 建滔積層板績佳候低吸 |
| 上一篇： | MSCI環指跌 美日港股尋底 |
