熱門:

2016年4月19日

方卓如 方如玉帥

好彩生意仲有得做

巴西總統面臨被彈劾,如果按照「House of Cards」嘅邏輯,有機會被彈劾已經要辭職。巴西本來係一個好有憧憬嘅國家,金磚四國,經濟高速增長。世界盃輸波之後,國運急速直下,再加上寨卡病毒,恍如回復第三世界水平。國家興盛係要幾代人努力,國家衰落只要一個人就搞掂。根據曾經在巴西經商嘅人士講述,呢個國家根本唔可以做生意。勞工法例唔鼓勵員工做嘢,亦唔容許僱主炒伙計魷魚,總之老細去到做生意,只得一個煩字。

香港唔會有巴西嘅情況,唔係話香港冇彈劾程序,有,只不過我哋有個永遠唔會錯嘅政府頭目,所以彈劾程序係用唔上。

金融才俊快泛濫

香港就算冇巴西式嘅民主程序,至少有做到生意嘅環境。連生意都冇得做, 香港就真係玩完。金融係香港嘅命脈,呢行係龍係蛇,就反映咗香港做生意究竟得定係唔得。

就我雙眼目睹,而家金融直情係經濟唯一支柱。你唔會知道,原來有咁多有本錢有實力嘅人,通通最近轉型做金融。佢哋嘅背景,有做實業,有做地產,同股票完全沾不上邊兒。而家個個都要攞1、4、9牌,全部轉型做經紀,就知道而家做生意只剩下一行。

點解乜都唔做得,只有金融?好簡單,做生意,唔係用錢就係用人。用人,你會好煩。用錢,你煩少好多。以前金融可能有啲專業知識,唔係個個識做。今時今日,軍事轉民用,傳媒日日講財經,民間出現咁多高手,人人都認為自己可以做金融。可以想像,未來三年金融才俊泛濫,每個人都同你講買殼,個個都問你做唔做GO,香港名副其實是一個金融城市。巴西因為政治而分裂,香港早已分裂,幸好生意仍然有得做,好多人可以唔過問。到生意都冇得做,香港仲慘過巴西。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads