啤殼造就「殼花」誕生

呢個星期只係過咗兩日，已經又有5隻新股上市，其中過半數為創業板掛牌股份，包括周一上市嘅Hypebeast（08359），同埋尋日上市嘅思博系統（08319），仲有由翠如BB老豆擔任CEO嘅聯旺集團（08217）。3股的共通點係以全配售形式上市，完全唔受外人玩，而3股配股價分別為0.13元、0.25元同0.26元，上市首日升幅均以倍數計。

莊家一條龍服務

呢類創板股早已被標籤為「啤殼股」，而坊間亦早有唔少文章或行家曾發表有關港股已淪為「啤殼工場」嘅言論。其實「啤殼煉金術」喺行內已唔係乜嘢秘密，更有莊家跟殼主合作，莊家提供一條龍服務，甚至有莊家出資「造殼」（打造上市業務）、「養殼」（令業務達至創板上市要求）、「賣殼花」（上市前已搵定潛在買家買殼），用盡上市過程放大「啤殼煉金術」嘅回報率。

市場對於創業板出現「圍飛作歹」以及「啤殼煉金術」已見怪不怪，反而阿Man一班行家呢期討論嘅係，「啤殼煉金術」一般玩幾耐。喺呢個速食年代，要套現當然愈快愈好，所以自從啤殼成風之下，亦演變出賣殼花呢家嘢。其實「啤殼」為將來「賣殼」鋪路，本來就唔係乜嘢新鮮事，只係過往多數發生喺由主板分拆上市公司身上，皆因原有殼主一變二，多咗隻殼當然可以甩咁隻套現。

只係近年創業板股份啤殼風氣盛行，本來上市目的就係為咗賣枱，既然目標清晰，倒不如一成功申請上市，即將控股股權預售，莊家回本期更短，「啤殼煉金術」亦愈玩得出神入化，造就一隻又一隻殼花登場。基於上市條例，上市公司喺上市首年，並唔可以將控股股權易手，不過買家「求殼若渴」，願意好似買樓花咁樣，先落部分訂金持有小量股份落訂，由於呢啲股份早就圍晒飛，莊家100%操控，準買家亦唔擔心。

圍飛造市明目張膽

港股上市殼咁值錢，多得一班內地買家捧場，皆因A股要借殼，成本往往以10億計數，喺港股搞backdoor listing，主板殼一般講緊5、6億，創仔更只係2、3億，對於內地用家嚟講，簡直係平到跌渣。市場有需求，自然有人供應，啤殼呢門生意亦應運而生。

證監會同港交所好快就監管創業板上市同backdoor listing進行諮詢，未知屆時會唔會有新招對付「啤殼煉金術」。其實圍飛本身已屬造市嘅一種，更何況啤殼一條龍，基本上係明目張膽嘅製造虛假市場行為，證監會可以一直容忍，莫非都了解到而家搵食唔容易？

下一篇：	向史上最賺錢對沖基金「偷師」
上一篇：	中資股轉強揀目標

文章：

— 麥狄文

更多...