《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年4月6日
最近上搜尋器打「巴拿馬文件」一詞，即出現水蛇膥咁長嘅訊息，閒閒地睇三日三夜都睇唔完。呢份由國際媒體披露多達過千萬份機密文件，當中涉及全球多國政要如何利用「避稅天堂」隱瞞財富，以及逃稅、挪用國家資產、避過制裁及洗黑錢等非法罪行。
近年，全球發達國家對於相關洗錢及避稅行為均採取嚴打政策，除咗針對個別問題戶口外，多國尤其是美國司法部更對相關戶口嘅投資銀行或零售銀行提出檢控，指銀行協助客戶逃稅及洗錢等罪行，並對銀行罰款。過去幾年唔少銀行都被美帝罰款，合計總額達百億美元計。
其實好似獅子錢莊老頂解釋，獅子錢莊咁大規模，全球員工閒閒地一百幾十萬人，當中樹大有枯枝，實在難以確保冇人出蠱惑，或有任何失誤。尤其2008年由華爾街席捲全球嘅金融海嘯，世界金融系統可以話七國咁亂，期間管理出現失控亦唔出奇。
眨吓眼，金融海嘯至今已8年，為咗撥亂反正，呢幾年銀行對於審理新開賬戶變得愈嚟愈謹慎，尤其係大牌子錢莊同鬼佬投行，個人戶口開戶時，除咗所需基本文件外，幾乎查埋祖宗十八代，一旦發現身家唔夠清白者，基本上唔接受開戶。個人戶口喺大牌子錢莊開戶較麻煩，若然喺二線錢莊開戶則較為容易，只要有香港ID同埋住址證明，有錢開個人戶口問題唔大。
個人戶口開戶已經多多要求，講到公司戶口更加無情講，大牌子錢莊除咗打爛沙盤問到篤，公司背景、經營業務性質、股東背景等等，只要其中一項過唔到法規部，公司戶口唔使旨意開得成。
至於二線錢莊要開公司戶口，可能審批會手鬆一啲，不過，無熟人介紹基本上唔接受申請。家陣閣下若然喺獅子錢莊或者其姐妹錢莊有個公司戶口，可以話高人一等，如果閣下嘅係離岸公司如BVI都有銀行戶口，就更加難能可貴。
錢莊寧少啲生意唔願博
香港錢莊戶口之所以咁難開，當然同美帝就AML（反洗錢）法案，瘋狂狙擊各大錢莊有關，為求自保錢莊對於KYC（認識你的客戶）政策執得好緊，寧願做少啲生意都唔願博，搞到喺香港開公司戶口難過登天。早兩年唔少香港註冊公司過大海喺澳門錢莊開公司戶口，不過近呢兩年，澳門錢莊開公司戶口難度已增加，竟然有註冊公司走到第三世界國家嘅銀行開戶。由於第三世界國家經濟增長較快，金融活動亦隨之而變得頻繁，喺嗰啲國家嘅銀行開戶一般無難度。不過面對第三世界國家政局不穩定，以及外滙波動等風險因素，即使成功開到銀行戶口都牙煙。
訂戶登入
| 下一篇： | 廣深鐵息高 攻守皆宜 |
| 上一篇： | 創達概念煞食隨時炒上 |
