熱門:

2016年3月30日

麥狄文 金融街密語

1仙係咁沽 低處未算低

噚日跌幅榜冠軍係毅信控股(01246),股價全日瀉37.5%,本來無乜特別,不過睇番買賣兩家就戥班小股東可憐,皆因1仙淨沽不特止,仲要係完全無買家,即係肉隨砧板上任由宰割。公司喺上星期四發通告,建議「25合1」,合股後再「2供11」,供股價為0.165元,較宣布當日收市價0.016元大幅折讓58.75%。呢個消息一出股價急跌唔在講,最慘係噚日除咗開市第一分鐘,幾乎係無處可逃,全日皆處於1仙淨沽呢個狀態。

其實喺3月份裏頭,大大話話有十幾廿隻股份玩緊同一樣嘢,就係又合又供,而毅信出1仙淨沽呢個場面,當然係其合股跟供股計劃最狼死,嚇到所有股東喺計劃實行前先行跳車。睇番一年前嘅4月,毅信曾以每股0.73元配售8300萬股,同年6月股份1拆10後,8月再1送4紅股。當4月完成配股後,股價即炒上,其後宣布股份拆細及送紅股,股價更於7月份一度升至0.25元高位,較4月配股前股價不足2仙勁升10倍。紅股派送後,其股價拾級而下最終更打回原形,甚至跌穿2仙起步位,一直低位橫行。睇番毅信最大股東持股量僅僅過10%,即係九成街貨,可見舊年咁搞一搞,又係班小股東最慘情。如今大比例供股,擺明係想趕走一批街客,大股東自己供番,令股權較為集中。經此一役,毅信可能又落得專搵小股東笨的臭名。

下一水或輪到洋參

毅信去年配股好明顯係一次股權易手,其後股份拆細為乜,公司未有解釋,再之後1送4紅股亦係一頭霧水,不過咁搞一搞,公司發行股數就暴增至249億股,為今日合股留低線索。阿Man一直都唔係好明,究竟公司合股拆股有乜準則,記得之前提過有個別上市公司,申請拆股確係為咗增加流通量,可惜被港交所(00388)駁回,最終惟有以送紅股變相拆細,解決流通量呢個問題。

阿Man聽上市公司老友講,港交所對於拆細股份多數抱一種態度,認為公司拆細股份就係為咗落鑊炒番轉,所以對於申請拆細通常諸多留難,相反合股就好少有詐型,造成唔少仙股合完再插水,小股東任由宰割呢個現象。而合股亦畀市場一個印象,股份將會向下炒,所以通常宣布合股嘅公司,股價十居其九都係插水,甚少能逃過一跌。而近呢兩個月,唔少宣布合股嘅公司,好似尋日暴跌嘅毅信,仲有錦興(00275)、中國神農(08120)等等,合股之餘都搞埋供股,之後股價表現係點,都唔使阿Man多講。

至於嚟緊仲有邊隻股份最有機會又合又供,估計係股權將易手,並已宣布以每股1仙發行400億股新股嘅恒發洋參(00911),由於股份去年曾1拆10,目前發行股數已超過200億股,再加理400億股新股,又點會唔乘機搞番次10合1,令發行股數回復100億股之下。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads