商業奇才也靠父幹

美國著名基金經理彼得林治（Peter Lynch）嘅投資心法，相信金融圈中唔少人都耳熟能詳，就係從生活中揀潛力股，而香港亦出咗個本地薑商業奇才，同樣係從生活中發掘商機，開展多門生意，講緊嘅係「舖王波叔」孻子鄧耀昇。話說鄧公子一直跟隨其父親學習投資多年，早已學曉「用得唔好嘥」呢個道理，與其低價把吉舖出租，倒不如好好利用吉舖搞生意搵錢。

吉舖搞生意一條龍

而鄧公子一直搞嘅生意，正正係從生活中發掘商機，好似2010年鄧公子創立婚禮統籌公司拉斐特，正正係因為之前小登科，大搞婚禮需要搵婚禮統籌幫手。當涉足婚禮統籌後，佢又發現一個婚禮最重要就係婚宴部分，而婚宴場地及餐飲更加係新人最捨得花費之處，反正都需要向其他飲食集團租借場地，倒不如為顧客提供一條龍服務，拉斐特顧客唔使擔心搵唔到場地之餘，婚禮統籌生意又可以撈多筆，實在係一舉兩得。

兩年前，波叔收購東海，正正係由鄧公子擔任主席，負責整個飲食集團，接手時東海共有11間分店，今時今日增至15間，4間分店為自用舖，貫徹執行「用得唔好嘥」呢個道理。

為愛兒成立playgroup

鄧公子既然成家立室，下一步當然係做老豆，當鄧太去年有喜之際，佢就報定名牌playgroup畀仔女適應學前生活。鄧公子又再發功，為尚未出世嘅愛兒搞咗間playgroup集團。不過，可能選址理想兼且配套一應俱全，所以playgroup集團一面世，已被一間名牌連鎖教育機構睇中，鄧公子以可觀租金租予其作幼稚園之用，實行坐定定有錢收，而愛兒將來亦可順理成章入埋名牌幼稚園。

鄧公子可以話把彼得林治嘅生活揀股精神，完全發揮喺做生意之上。阿Man忽發奇想，鄧公子喺唔同人生階段受啟發而發展多門唔同嘅生意，而人一生之中必定經過生老病死，既然搞得婚禮統籌、飲食集團同學前教育生意，遲吓極有可能搞埋醫療集團；而再行前多一步，最終可能殯儀業亦會涉足。

不過，無論鄧公子再有生意頭腦都好，都要有個家財萬貫、物業商舖多過銀行米舖嘅舖王老豆配合，商業奇才缺父幹，亦難以有所發揮。

下一篇：	擎天軟件受惠「十三五」
上一篇：	平保績優跑贏國壽幾條街

文章：

— 麥狄文

更多...