熱門:

2016年3月16日

麥狄文 金融街密語

暴跌股也可搵到水

近呢兩三個月,特別多暴跌股,之前唔少係因為大股東押股被斬倉引發股價暴跌,亦有股份係受負面消息影響,引致股價急瀉。

好似喺上星期四個交易日內累跌逾七成嘅十方控股(01831),就係受到負面消息影響,同時亦拖累其主要股東大中華金融(00431)股價單日跌四成。呢兩隻股份股價插水,主要原因係有關電影《葉問3》內地票房「篤數」問題,被內地電影局調查,電影投資者十方控股因此股價連日下跌。其後公司澄清沒有參與該電影在中國發行事宜,僅為電影收益的投資方,雖然兩股短暫停牌後復牌,股價均勁彈,但尋日股價再度回軟,似乎暫時謠言仍未止於智者。

識人又疊水穩賺

阿Man收到風,關於內地票房「篤數」其實唔多可行,皆因涉及稅務問題,冇投資者或發行商會走去「篤數」,無啦啦因此而交多好多稅。

所以聽聞有電影業運作投資者,見十方股價連日下跌,喺1元樓下大手掃貨,而趁股價反彈撈番筆。睇番十方喺3月10日當日成交極為活躍,全日成交量逾4億股,當日股價則最低0.79元,收市報1.13元,相對尋日股價1.5元樓上,即係當日低位接貨,回報率至少都四成。

十方呢個例子係投資者運用本身對行業嘅知識,評估低位買入急跌股嘅值博率,而另一個例子就係關乎投資者嘅人際網絡關係,喺股價極度低殘時撈粗嘢。

講緊嘅係輝山乳業(06863)主席楊凱,事關恒發洋參(00911)單日急跌九成爆煲後,主席楊永仁因財困而要賣股套現,聽聞喺恒發洋參1月28日急跌停牌後,即時以每股1.9仙兜售逾12億股股份,當時就連阿Man老友都接到呢個盤。

阿Man老友亦考慮拎二千幾萬出嚟接貨博一博,反正1.9仙售價較恒發洋參當日停牌收市價3.4仙折讓五成有多。只不過當老友考慮之際,已接獲通知1.9仙售股已封盤。

至2月5日恒發洋參復牌後,股價大幅反彈,其後有報道指楊凱當日已掟貨,以6.8仙沽出逾11億股,套現7707萬元,並保留約1億股。睇番資料,楊凱2月4日接貨,涉資約2343萬元,翌日沽貨套現減番個本,咁就半個億袋袋平安。

當時恒發洋參賣股主要由接近楊永仁嘅老友、仆架去放盤,即係講到尾又係要識人,可見人際網絡喺呢行幾緊要。至於點解最終呢個「筍盤」會落咗喺輝山主席楊凱手中,阿Man不得而知。暴跌股一樣有人從中獲利,只不過呢啲機會從來唔屬於你同我啫!

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads