大股東押股未必惹斬倉

高銀地產（00283）主席兼大股東潘蘇通向中國銀行（03988）押出其全部持股，以換取最少100億元信貸額度發展私人業務。市場普遍認為呢個係負面消息，即使主席已接受彭博訪問解畫，指今次押股唔涉及孖展融資，而借貸人為商業銀行，中行亦已承諾唔會將股票借出予人沽空，即使公司股價出現波動，亦不會因而被斬倉。

此外，潘主席強調押股調配資金並非用作還債，而係用作擴張業務，包括2013年所收購德國Gigaset手機電子產品公司，以及可能投資機械工人業務等。潘蘇通亦表明唔會減持高銀股份或賣盤。唔知係咪主席呢番說話，為其股價打咗口強心針，呢個消息公布後，公司股價不跌反升。

高銀孖寶疑阿爺打手

不過近期有多隻股份涉嫌因押股融資而遭斬倉，包括中國罕王（03788）同中國天化工(00362)，以及之前阿Man都講過按倉過度而斷送江山嘅恒發洋參（00911）。一旦市場聽見大股東押股都係聞之色變，尤其高銀地產同高銀金融（00530）一對孖寶，一向被視為暴炒股，兩者均於去年3月於5元水平起步，前者喺去年5月高見27.6元，後者則高見逾35元一股，升幅已倍數計，其後股價雙雙回落，兩者現價均較高位跌逾八成。

雖然市場都擔心高銀孖寶遲早又玩高台跳水，阿Man細心分析之後，認為呢個可能性唔大，主要係阿Man懷疑高銀孖寶本身係阿爺欽點企業。

先睇睇今次主席押股市值唔到90億元，但可取得信貸額度卻最少100億元，押股唔使打折頭，仲可以借突股份價值，唔會係一般民企可以得到嘅待遇。

另一方面，高銀金融上星期以64億元投得一幅何文田地皮，再計埋公司喺2011年以逾34億元投得九龍灣商業地項目，高銀喺香港地產發展項目已合共近百億港元。公司目前市值唔到70億元，竟可以鯨吞超過公司市值嘅地產發展項目，若非有強大後盾，斷估唔會貿貿然咁做。

雖然唔少專家認為君子不立危牆之下，建議先沽出所持高銀股份，阿Man則不以為然。上市公司大股東押股，尤其係借錢償還私人債務，如果10個樽得8個蓋，被斬倉風險確係極高；但高銀今次既非押股融資，又唔係同證券行交易，目前不過係先預留信貸額度，加上高銀背景神秘，非但疑似有阿爺撐腰，更唔排除係阿爺打手嘅可能性，計及呢幾個因素，高銀主席是次押股，未必會引致公司股價跳水。

放大圖片 / 顯示原圖

下一篇：	上落市心法武俠小說眾裏尋
上一篇：	股神又來信

文章：

— 麥狄文

更多...