《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年3月2日
每年新正頭阿Man一定重幾磅，皆因由過年前開始，行家請食團年飯，出席唔同公司晚宴，再加埋日復日唔同公司嘅春茗，連續個幾月不斷飲飲食食， 有乜辦法唔肚滿腸肥?偏偏今年阿Man一磅肥肉都冇增加，仲要深深感受到市況沒有最差，只有更差。
粗略點算一吓，今年阿Man出席有關過年過節嘅公司宴會，竟然唔到舊年十分一。冇錯，係十分一。
原因唔係阿Man人緣差咗不獲邀請，而係好多公司因為cut budget，年夜飯、春茗加埋之前公司年度聯歡，三餐縮一餐，咁就慳番一大筆。呢個情況都仲叫有一餐食，個別公司再慳水啲，只係宴請內部員工，其他行家合作夥伴同客仔一律唔請。最誇張係有啲公司索性冇咗件事，莫講話bonus冇得出，就連一年一度食餐好嘅都冇埋。
慳得就慳預市況更差
呢個情況反映舊年經歷假牛市再股災步入熊市後，唔少公司都冇啖好食；慳得就慳係為今年沒有最差、只有更差嘅市況做好準備。咪以為單係香港出現咁嘅情況，過咗大海嘅澳門，情況更嚴峻，僅餘幾家大型博彩企業繼續大搞annual dinner，其他公司都係求求其其，甚至避得就避。就連喺當地一向興旺嘅「二叔公」行業，同樣縮皮，聽聞過往多年均搞番七八十圍廣宴同行友好嘅龍頭企業，今年影都冇。
口痕友話老闆着埋草，仲有乜資格大排筵席。記得早幾年澳門百業興旺，個個撈到風生水起之時，唔少老闆搞幾瓣生意，新正頭同一個老闆，可以請食幾次團年飯加春茗。阿Man有老友試過一星期過大海幾次遠赴春茗，坐船都坐到暈。相比今時今日生意凋零，唔怪得之阿Man今年食少咁多餐。
講開澳門「二叔公」，過往「二叔公」買賣名錶亦係一門搵銀生意，但自內地大力打貪後，客仔上門有賣冇買，大部分係為咗度水而來，二手名錶買賣拍烏蠅，就連一手名錶代理亦話門可羅雀。為咗保持一定生意額，惟有割價求售。過往一線名牌手錶，唔好話爭崩頭冇價講，個別款式更以炒價發售，都仲有唔少客仔排住隊搶貨，而家梗冇呢支歌仔唱喇。冇咁受歡迎嘅款式，打折係基本動作，是但一個walk-in客，求其都打個九折甚至八五折，只要客仔肯要求，八折一樣有得傾。至於熟客又或者豪客，七五折起步，七折一樣有交易，客仔夠豪肯大手掃貨，一次過掃幾隻錶走，六折破晒底價交易亦唔出奇。
其實新正頭阿Man唔係想向大家潑冷水，只係種種現象都反映今年經濟可能比往年更差，大家要有心理準備捱世界，一切萬物循環有序，只要捱得過呢個寒冬，一定可以迎來下一個暖暖春日。
訂戶登入
| 下一篇： | A股失勢 內房得寵 |
| 上一篇： | 一勤天下無難事 不悔真情不悔癡 |
