《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2016年2月24日
東亞銀行（00023）自從公布業績之後，被多間大行齊劈目標價，其中大摩跟美銀最心狠手辣，將目標價削至20元樓下，最低睇19.18元。東亞被多間大行睇死，除咗受累內地資產質素轉壞之外，加上淨息差環境受壓，盈利預測被一再調低，更表示東亞今年將「跑輸大市」。
其實東亞另一個致命傷係李氏家族跟管理層一再重申拒絕賣盤，喺併購憧憬幻滅下，更被視為質地最差嘅本地銀行股。
唔單止被大行狠批，公司第四大股東對沖基金Elliott更發公開信，指東亞管理層表現欠佳，理應以2倍市賬率為目標賣盤顯現公司價值。李氏家族抗爭到底，除咗致函股東指Elliott賣盤建議有損公司及股東利益，要求喺疲弱市況下賣盤，只顧圖短線利益，未有考慮長期可持續發展業務及東亞喺大中華地區嘅市場地位。至於Elliott會唔會跟三井同西班牙Caixabank打聯盟，暫時係未知數。不過以往多次想買起東亞而喺市場增持嘅國浩（00053），今次反而未見有掃貨行動，就有些少耐人尋味。
聽聞李氏家族為保其管理層地位及繼續控制董事局，除咗兩兄弟齊齊喺市場掃貨增持之外，亦向阿爺發出SOS求救訊號。阿Man收到風，阿爺已搵咗幫手，東亞方面亦度好晒橋，如何應付狙擊手Elliott。有消息話為阻止狙擊手跟另外兩個主要股東聯成一線，向李氏家族「逼宮」，東亞將發新股引入四大行其中一間成為策略股東，呢個方法可以冠冕堂皇地向其他小股東交代，配股集資有助強化銀行資本，應付有可能進一步惡化嘅內地資產，引入四大行之一作策略股東，則有助持續發展大中華業務。
狙擊者或趁機平手離場
對於東亞管理層而言，有阿爺拔刀相助，一方面可擊退對沖基金狙擊，李氏家族亦可坐穩董事局個位，繼續其東亞李氏天下。另一點係四大行入咗東亞坐鎮，一向對東亞虎視眈眈嘅國浩日後未必再明目張膽公然吞併東亞，始終會畀番幾分面阿爺。
東亞批股引入策略股東係一石多鳥之計，問題係究竟以乜價錢配股。聽講阿爺都好公道，至少都會出番1倍市賬率價錢，即係點都唔會低過每股29.313元。計一計條數，Elliott去年買入東亞成本價約為每股30元，如果阿爺出手唔低過1倍市賬率，呢個狙擊手或者可以趁機打成平手離場。
訂戶登入
| 下一篇： | 中石化冠德反彈目標4.4元 |
| 上一篇： | 恒生穩健有餘暫無賣點 |
