熱門:

2016年2月22日

高仁 財圈識真假

跌市投資穩勝法

上文提要:2016年環球股市開局異常動盪,港股首3個星期就急瀉近3000點;踏入農曆新年以來,急跌急升,反映猴年猴子的活潑好動性格提早出現。部分上市公司發現股票融資方式不可行,而秘技是改在內地發行人民幣債券。

「高仁指點」話你知,部分上市公司發人債後,股價炒上,要在跌市中贏人又贏自己,可以參考「豬朋狗友」施友化的跌市投資穩勝法,原因如下:

‧部分資金用作投資內地產業基金,而姊妹基金購買該上市公司股票;

‧部分上市公司老闆私人獎勵長期持貨投資者,以確保不會沽出股票。

在披露對話實錄之前,請各位「巴打」與「絲打」重溫人物背景,簡介如下:

程更計─本地證券行經紀兼財務顧問,除了招呼散戶之外,亦向上市公司出謀獻計;

施友化─擁有公司私有化經驗的前「唉賓」,被看中轉型為上市公司CFO。

高 仁:施友化,呢度啲燒鵝左脾係咪好正呢?

程更計:施友化,馳名燒鵝左脾食咗,普洱茶又飲咗,你快啲教我乜嘢跌市投資穩勝法啦。

施友化:OK!OK!我之前咪問,有冇發現部分公司發人債後股價炒上,你哋知唔知道點解嘅?

高 仁:正路嚟講,市場見到上市公司發債融資,而啲錢又係攞去發展業務,可能覺得公司有「前途」(註:專登講錯,應該係前景),資金追捧咪刺激股價上升。

資金投進基金買股票

施友化:另外一個原因係上市公司攞咗部分資金去投資內地產業基金;同時,要求該基金嘅姊妹基金用部分上市公司嘅投資款項,喺二手市場或透過配售去買返該公司嘅股票【圖】。

程更計:上市公司發人債cap水融資買基金,基金轉過頭又用嚟買返公司嘅股票,怪唔知得股價可以炒上去啦!

高 仁:我仲聽聞,如果上市公司在內地發債嘅融資成本係7%嘅話,上市公司會把發債融資所得資本投入基金,然後向該基金承諾如果將筆錢重投上市公司,就可以得到最少8%嘅現金回報。你話筍唔筍?

程更計:基金聽到咁筍,一定𦧲飯應啦。

基金獲現金回報承諾

施友化:冇錯。上市公司突然有咁多基金買盤支持,股價就自然會節節上升啦,而基金賬面亦會賺到唔少錢。

程更計:但係點解基金又肯落搭嘅?

高 仁:原因好簡單啫,基金主要係睇年結時投資組合內股價派發表現獎金,既然有上市公司承諾畀到8%嘅最低現金回報,當然願意配合去買入公司嘅股票。而且,基金冇投資者肯注入資金,fund man就隨時連份工都冇理。

施友化:係呀!呢啲咪係老外成日講嘅,You scratch my back and I'll scratch yours囉。而且,呢個係良性循環,但安排妥當就合規合格。

程更計:咁有冇一啲唔合規嘅呢?

施友化:當然有,聽聞有一啲內地上市公司老闆,佢哋會私人獎勵長期持貨嘅投資者或基金,以進一步確保投資者或基金唔會沽出手上股票,但呢個做法就可能不合規不合格囉。

程更計:怪唔之得,基金在跌市之中都可以穩勝啦!

本欄逢周一刊出

歡迎交流上市公司的財技個案及招數,請電郵至 [email protected] 

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads