跌市遇供股慘上加慘

2016年第一個月眨眼過去，成個月環球市場得一個跌字，各地市場市值閒閒哋蒸發一兩成，香港更加係股滙齊跌，股民唔單止身家縮水，喺港滙下跌影響下，購買力亦大大減弱。有人問阿Man個市由去年4月高位，恒指28000點水平，累跌近萬點至本月18000點水平，市賬率更罕有地跌穿1倍，何解仍未見有個似樣啲反彈。其實道理一字咁淺，就係錢作怪，全城股民莫財，無生水流入市場，港股只有賤物鬥窮人，愈平愈冇人買。

全城「莫財」賤物鬥窮人

港股本月累跌超過一成，照道理早已出現恐慌性拋售，散戶連櫃桶底倉底貨都盡沽，港股就有望見底。偏偏成個月咁多個交易日，仍未見呢個情況出現過，唔通香港股民愈嚟愈成熟，面對大市風浪都能處變不驚？非也！而係想驚都無得驚，甚至已無感覺，又或者係無資格再恐慌。一班狼死嘅孖展炒鬼，喺去年7、8月內地去槓桿化同時，早已被斬倉淘汰，即係無資格再參與，今次自然無資格恐慌。有實力持有現金倉，斗零唔借又如何，個股票戶口日復日貶值，藍籌唔見兩三成閒閒哋，股仔五成叫做好彩，賬面揩七八成比比皆是，揩足九成亦大有人在，咁情況下仲邊有資金再入場？

上面講緊係已投入市場資金唔見一大截，最慘係遇上市公司要度水，懶理市況如何，都係要向股東伸手，咁嘅環境反而持實貨嘅投資者最慘情。本來所持貨值已縮水，一個唔覺意公司宣布供股，咁就確係「窩可」。面對日復日跌嘅股價，輸到心都實埋，仲要再科水供股，唔供被攤薄，供咗仲大鑊。好似君陽金融（00397）去年5月供股，嗰陣個市已見頂回落，公司宣布二供一，每股供0.26元。家陣望一望股價得番0.042元，即係供嗰筆已唔見咗六成幾七成，原本嗰舊仲誇張，輸足九成。較近嘅例子要數協鑫新能源（00451），上個月底以八供三，每股供0.45元，昨天收市價0.355元，未夠一個月時間，單係供嗰批每股又唔見近兩成，供股仲慘過補孖展填氹。

阿Man估計，今年上市公司集資通常都會以供股為主，旺市批股大把人爭住要貨，咁跌市冇人肯接貨，要抽水惟有行供股呢條路。供完股跌當然係慘情；不過，小股民永遠面對嘅沒有最慘，只有更慘，就係唔少四五六七線股仔，跌咗九成以為跌無可跌，公司一個唔該話合股，合完又可以再插過，如果心水清者，應該知道有股仔現價得一個幾毫，但歷史高位係過萬一股，咪以為往績夠勁抽，只係公司合完再合又再合，當合股N次之後，自然會出現過萬元一股嘅超級高價，可以想像得到當中蒸發咗幾多小股東血汗錢。

放大圖片 / 顯示原圖

下一篇：	聽貝南奇後試看中美經濟
上一篇：	中移動利淡已呈可博

文章：

— 麥狄文

更多...