民企老闆盲目追求名牌投行

話咁快又一年，回顧今年投資市場係先甜後苦，當第二季缸邊友仲沉醉於港股大時代來臨之際，原來A股股災已經等住喺7月上演；緊接8月人民幣忽然大幅貶值，引發新興市場走資，中港兩地股市沒有最低，只有更低，阿爺連環出招救市亦無補於事，港股慘變國際提款機，本來賺到盤滿缽滿嘅缸邊友，手上股仔頓成蟹貨，原來港股大時代不過係南柯一夢。

雖然話港股今年多災多難，但港交所（00388）重奪全球集資額最高交易所寶座，可見港股今年仍然相當熱鬧，尤其內地暫停新股上市一段時間，亦驅使唔少內地企業改咗喺香港上市集資，投行搞企業融資嘅團隊，今年仍然大豐收。

上星期講過唔少新股上市即潛水係有苦衷，阿Man同個行家傾開呢個問題，行家就話某啲上市公司老闆其實唔抵可憐，原因係公司搞上市時，唔少老闆、尤其係民企老闆，都盲目追求名牌，非要搵大牌子嘅投行搞上市，結果公司係成功上市，但上市後冇after market安排的話，股價一樣要潛水。

蚊型行真係幫到手

行家話與其盲目追求名牌投行，心甘情願付上高昂顧問費，倒不如搵啲真係幫到手嘅蚊型投行，慳咗顧問費預留搞after market，對公司上市後表現更有保證。

最近有單case正正係某內地民企搵咗最具規模中資背景嘅投行做保薦人，投行呢個case收成700萬元顧問費，不過，除咗孭住保薦人呢個名義之外，就繑埋雙手等其他上市團隊做晒嘢，當然after market安排亦欠奉，結果新股上市又係即時潛水，所以名牌投行唔一定幫到手。即使花費高昂嘅上市費用，若然新股認購方面冇好好部署，尤其係配售部分搵唔到大孖沙肯坐貨，搵到再多名牌投行做保薦或包銷，一樣冇用。

今年反而有幾個名不經傳嘅保薦人，佢哋安排上市嘅新股，全部錄得可觀升幅，事關呢幾個保薦人，除咗安排上市之外，最重要係搞好晒本book，國際配售部分全部搵晒投資者認頭，IPO部分貨源有限，即係成手貨坐到實一實，上市後貨源仍歸邊，股價自然一飛沖天。

不過，民企老闆一於少理，亦係一般土豪特性，話之你識飛天，唔係名牌一向唔錄用，難怪行業龍頭嗰十間八間投行，喺市況艱難時，一樣賺到笑。

講到底做乜生意都一樣，能成功建立一個品牌最重要，一旦成名做咗行業名牌，名氣大咗就算hea住做亦能生意滔滔，財源滾滾來。