熱門:

2015年12月23日

麥狄文 金融街密語

新股上市潛水有苦衷

臨近年尾,唔少公司趕搭上市尾班車,單單喺12月之內,已掛牌新股截至噚日為止都有14隻,而已截止認購準備大除夕前掛牌的新股亦有7隻。呢個月新股相當旺場,難怪港交所(00388)今年成為全球集資額最高交易所。

一間公司搞上市集資,原意就係透過股票交易平台籌募資金,發展業務。不過,咪以為成功上市咁容易,本來公司搞上市就得過五關斬六將,過得到上市審批,仲未算大功告成,要成功集資,最終係要啲股票賣得出,先算係真真正正集到資。偏偏今年中發生咗「708股災」,港股可以話唔生唔死,成交金額每況愈下,做sales嘅莫講話搵客買賣股票有難度,要sell新股更加難上加難。由於市況欠佳,成交縮水,市場水清無魚,令唔少新股上市後即告潛水,令捧場客接貨後坐艇,所以唔少客人,特別係資金雄厚、有機會落大飛嘅疊水客戶,喺認購新股前都會問究竟認購對象有否作after market準備。

成交淡靜「市場活動」難搞

乜嘢係after market準備?咪就係新股上市後,有否安排維持市場秩序,有冇資金會喺市場再掃貨等等嘅「市場活動」咯。若有安排的話,即係新股上市後將有機會落鑊炒番轉,咁認購者亦有信心落飛。當然喺市旺好景、資金泛濫之時,無論高端投資者或散戶炒家,都樂意認購新股,基本上唔需要安排,「市場活動」都可能自動波搞得掂。

但當市況淡靜,魚缸缺水嘅日子,要「市場活動」搞得好,最終又係要上市公司老闆掏腰包,又或者搵到友好肯出錢出力,然後再交由合作團隊安排。本來搞上市最低消費都要三幾千萬,當中包括會計、財務顧問、公關活動,仲有唔少雜項開支;若要搞埋上市後嘅「市場活動」,隨時動輒半個億,如此一來,公司集資後真係水瓜打狗,唔見一截。

對於某啲有心「啤殼」上市嘅公司,當然唔介意使呢半個億,皆因殼主當投資,過一年後賣殼,創板閒閒地兩三個億,主板更高達五六億,預咗賺得番。呢類上市公司根本係本末倒置,完全有違上市集資真正意義,當正搞上市係一門生意咁做。至於嗰批真正想透過股票市場籌募資金發展業務嘅公司,不成文規定上市後「市場活動」,往往令佢哋大失預算。一則上市成本幾乎倍增,若然冇呢個budget或唔願意搞「市場活動」嘅公司,可能連配售部分都認購不足。雖然上市有保薦人同包銷商孭飛,但咁嘅情況下,上市後股價定遭踐踏,輕易失守招股價,被標籤為潛水股。最慘係被界定為潛水股後,更難吸引缸邊友入場,上市後交投欠奉,搞搞吓更成為殭屍股,冇成交之餘,股價亦死到直一直,難怪唔少上市公司本來無心賣殼,最終亦為勢所逼,踏上賣殼之路。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads