《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2015年12月9日
2015年話咁快又就嚟完，每年呢個時候，成班行家話題不外乎估吓年底花紅有幾多，再唔係就講吓邊個跳槽轉公司，啱啱就有一班財演執咗位。不過，今年個市環境係點大家心中有數，年初個個以為大時代來臨，誰知只係曇花一現，緊接7月股災之後，無論港股抑或內地股市，一路未好過，大市有波幅冇升幅，股仔仲衰只係有反彈冇翻身。
咁嘅環境近期班行家出嚟吹水，已經唔係講有冇老闆挖角跳槽，外面有乜好路數，又或者計緊花紅會有幾大嚿。阿Man見親班行家，呢期都揦埋口面，花紅已經隻字不提，怕連雙糧最低消費都冇得收。講到轉工搵好路數，梗係唔使諗，之前阿Man講過，今年行頭要搵份好工難過登天，最慘係唔少做緊research嘅老友，而家有得震，冇得瞓。
市況欠佳成犧牲品
最新鮮滾熱辣就係缸湖傳聞港交所（00388）呢兩日派大信封，將成個資料研究部解散，就連部門主管Matthew Harrison呢個做咗22年嘅老臣子亦冇得留低。查實研究部一向被視為冇盈利能力嘅部門，當市況興旺時，研究部為滿足銷售部門需要，通常做到一頭煙，公司賺大錢又唔會歸功研究部。相反，每當市況低迷，拍晒烏蠅之時，研究部首當其衝，率先被開刀裁員。不過好似港交所將成個研究部解散，去得咁盡咁徹底，又唔係常見，可以想像得到港交所心中有數，明年市況有幾差。
睇番港交所近年僱員流失數字，有按年增加趨勢，2014年港交所僱員1420人，較2013年增11.11%，但去年僱員流失人數195人，按年增27.45%；流失率14%上升2個百分點，而2012年流失率有11%。
「滬港通」今年啟動，對成交未見有太大刺激，難怪對明年「深港通」落實，亦唔會有好大期望，所以要大刀闊斧，cut咗成個研究部。
記得阿Man入行時，已有老行尊警告過，新丁入行做分析員諗過先，除非立志成為fund man，否則做唔成基金經理，一直留喺研究部做分析員，每到市況欠佳時，一定成為犧牲品。再睇番唔少行內頂尖分析員，最終都會走向資產管理條路，成為基金經理人，其中陸東可以話係當中佼佼者。
訂戶登入
