熱門:

2015年9月21日

方卓如 方如玉帥

金融市場最快見效

經濟學家呢份工最難做。躲在辦公室諗一大堆嘅理論,要用實際情況去測試,結果唔係一朝一夕。萬一結果出錯,隨時係冇得修正,而世界可能已經被玩殘。聯儲局決定暫時唔加息,係壞消息多過好消息。點證明?股市跌就係壞消息,投資者用銀紙投票表態。

有人話唔加息令市場疑慮未能消除,但其實消除了未來一個月嘅疑慮,就係大市會繼續向下跌。目前沒有任何一個買貨嘅理由,任何推高嘅行為只會被人用嚟走貨,而走貨嘅機會將會愈嚟愈少。

經濟學家要睇數據嚟斷症,金融市場就係最快手見效嘅數字。半年前冇人對前景咁悲觀,而家個個好似哭喪咁覺得乜都唔掂。股市跌咗兩三個月,跌得最狠嘅係中國,但係未到令人貪婪嘅水平。香港跟跌,一樣未到引人貪心入市嘅水平。

市面蕭條只係開始

最慘係香港夾喺中美對戰嘅中間,經濟唔好但貨幣升值,全世界嘅經濟學家都計唔到數,咁嘅狀態如何有運行?

之前沙士,香港本來要時間復元,自由行令經濟迅速反彈,造就了唔少有錢人,我揸樓揸舖收租嘅,全部發大達。

但係同歐洲國家一樣,食咗補品等於借錢消費,把將來嘅收成提早收割。10年嘅高速財富增長,而家要找數。租金被自由行消費拉高到寸草不生,唔會咁易跌番落去。

租金水平頂住物業價格,減租就等於令自己變負資產。你見到二手樓成交冰封,其實舖位已經冰封好耐。物業市場作為經濟嘅寒暑表,冷風由舖位開始吹過嚟。

記住,樓市冇炒家,但舖位有。有炒家嘅市場特別大上大落,股市係咁,舖位都係咁。舖位同零售市道緊扣,你見到嘅市面蕭條現象,而家只係開始。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads