《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2015年8月3日
上文提要：高仁與「豬朋狗友」戴Sir及程更計飯局，談及有一家內地著名投行，曾經多次被不同的內地民企老總欺騙，損失慘重又損害到名聲，之後改變做事方法，取得民企老總的信任，變做「賊投行」，掉頭呃返民企老總。
除此之外，市場上還有一批「賊殼主」，與掉轉槍頭的「賊投行」合作，專門去做新殼主買家的「世界」。在披露對話實錄之前，請各位「巴打」與「絲打」重溫人物背景，簡介如下：
戴孤劃─又稱為「戴Sir」，《信報》「蠱壇辨虛實」專欄作家、上市公司大股東，經常欺壓小股東。
程更計─本地證券行經紀兼財務顧問，除了招呼散戶之外，亦向上市公司出謀獻計。
戴孤劃：兩位「鐵哥們」，燒鵝左髀就食完嘞，可以繼續講未？
高仁：飲啖普洱消吓滯先啦。
程更計：係囉，我哋咁耐冇出嚟食飯，慢慢吹吓水都得啩。
戴孤劃：吹水！？我秒秒鐘幾十萬上落，邊得閒同你哋吹水喎……「你懂的」，講笑啫。
幫民企買殼掉頭呃老總
高仁：阿程，既然戴Sir請咗我哋食燒鵝左髀，我哋就繼續講吓戴Sir關心嘅topic，例如係「賊殼主」咁啦。
程更計：好呀，冇問題。
戴孤劃：「賊殼主」？乜嚟㗎？
高仁：我哋之前咪講「賊投行」改變咗做事方式，而家主要係去爭取民企老總嘅信任，得到信任後，就掉頭去呃返民企老總。
程更計：呢啲民企老總嘅公司多數都係未上市，「賊投行」嘅角色就係擔當老總嘅軍師，一般會負責晒買殼、注資等行動嘅全盤安排。
戴孤劃：咁「賊投行」咪會知道晒老總下一步棋會點做同做啲乜？
高仁：Bingo，冇錯。
程更計：「賊投行」幫手為民企老總買殼，表面上一定會揀一隻乾乾淨淨嘅殼，但實際上係同原殼主即「賊殼主」夾埋合作，搵「人頭」揸住啲暗手股票齊齊搵食。
戴孤劃：有冇例子？
高仁：民企老總真金白銀買隻殼返嚟，當然希望可以有咁快得咁快注入資產，但係現實情況就相當困難。因為而家上市規則對新買家注資的要求，可以話係「沒有最緊，只有更緊」。
原殼主睇住食再賺一筆
程更計：不過，「賊投行」一樣有辦法可以做到，佢會同民企公司嘅FA（Financial Advisor，財務顧問）砌掂單刁，例如建議公司用高溢價發行CB收購資產，總之就一定可以過到關啦。
戴孤劃：民企老總之後踢高個股價，咁咪可以將CB兌換成股份，從而鞏固本身股權囉？
高仁：但弊就弊在，「賊投行」同民企公司嘅FA係friend底，「賊投行」又知道民企老總想踢高到邊個價位，「賊殼主」就可以睇住公司股價嚟食，準確掌握沽貨時機。
程更計：新殼主不斷泵錢去踢高個價，但「賊殼主」就一直出貨沽返落嚟，最終咪大賺特賺多一筆囉。
戴孤劃：嘩！民企老總咪好「慘慘豬」？
高仁：冇辦法啦，「賊投行」夾埋「賊殼主」一齊玩佢喎。
程更計：但有啲民企老總好醒目嘅，一旦發覺到公司股價走勢唔對路，就殺上去「賊投行」office講數。
戴孤劃：咁勇武？
高仁：民企老總點勇武都冇用啦，「賊投行」會話其他股東全部係I3P（Independent Third Party，獨立第三方），完全唔關佢哋事。
程更計：要怪只得怪民企老總冇洗乾淨太平地囉！
戴孤劃：原來如此。
高仁：戴Sir，今餐你找數嘞喎！
戴孤劃：OK「鐵哥」！ 等我嚟「華麗」碌卡啦！
本欄逢周一刊出
歡迎交流上市公司的財技個案及招數，請電郵至[email protected]。
放大圖片 / 顯示原圖
訂戶登入
| 下一篇： | 假盈警真收貨 錦藝爛船五分釘 |
| 上一篇： | A股去槓桿見效 反覆試底 |
