《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2015年7月27日
相信各位「巴打」都知道，高仁喜歡看電影，還記得以前一齣港產片《賊公子》，故事講述4個身懷絕技的偷車賊（由古天樂、雷宇揚、張耀揚、王敏德飾演），他們善於利用高科技應付防盜設備去偷取名車，但其中一名偷車賊卻是警方的臥底，其工作主要是取得偷車賊的信任，以便將偷車集團一網成擒。
在現實世界中，高仁知道有一家內地著名投行，曾經多次被不同的內地民企老總欺騙（最慘是被同一招多次欺騙），損失慘重又損害到名聲，之後改變做事方法，博取民企老總的信任，實行你做初一我做十五，做「賊投行」掉頭呃番民企老總，問你怕未？
高仁與「豬朋狗友」戴孤劃與程更計飯局，大家就談及「賊投行」的問題，阿程更稱「賊投行」的Practice早已街知巷聞。在披露對話實錄之前，請各位「巴打」與「絲打」重溫人物背景，簡介如下：
戴孤劃──又稱為「戴Sir」，《信報》「蠱壇辨虛實」專欄作家，上市公司大股東，經常欺壓小股東。
程更計──本地證券行經紀兼財務顧問，除了招呼散戶之外，亦向上市公司出謀獻計。
高仁：戴Sir，你真係好帶挈喎！
戴孤劃：（一頭霧水，以普通話回應）什麼？
高仁：咁都唔記得！？你上次喺專欄度忽然「射波」，要我拆解PCS內裏乾坤嗰單嘢呀。
戴孤劃：「鐵哥」，對不起啊！我見PCS咁技術性，咪「華麗」轉身「射波」畀你，咁做可以顯示出高仁財技嘅深厚功力嘛！
高仁：「巴打」，唔該你「華麗」轉身之前同我揚聲嘛，得果少少時間，差啲寫到我嘔血呀！
戴孤劃：唔好咁嬲。夥計，幫我落單要一隻燒鵝左髀，畀呢位「鐵哥」。
高仁：（怒氣有點下降）阿程仲未到喎，駛唔駛等埋佢先呀？
程更計：（說時遲那時快剛剛到達）Hello！唔好意思，遲咗。
高仁：阿程，做乜事遲到？
程更計：你哋都知啦，近排嗰市先急插後反彈，要沽貨嘅急住沽貨，要撈底嘅起勢撈底，真係做到冇停手。
戴孤劃：你就發達啦！
程更計：搵餐晏仔啫，有幾發喎！
改變策略博取信任
高仁：咁又係，點都唔似做「賊投行」咁發啦。
戴孤劃：「賊投行」？！
程更計：戴Sir，乜你冇聽過「賊投行」嘅故事咩？
戴孤劃：冇喎，「鐵哥」唔該講嚟聽吓。
高仁：其實，「賊投行」係講內地某一家著名投行，佢之前成日幫內地民企做Sponsor，又經常做PE直接投資，點知成日都「瀨嘢」。
戴孤劃：「瀨嘢」？點樣「瀨」法？
程更計：部分民企係造假數上市，公司上市之後無幾耐就爆煲，投行被追究做Sponsor嘅責任之餘，本身嘅投資都化為烏有。
高仁：佢被內地民企老總呃得多，惟有一度停止暫停做PE。過咗一段時間，佢改變策略去博取民企老總的信任，務求之後可以鬥呃搵食。
戴孤劃：鬥呃咁得意，快的講嚟聽吓。
程更計：高仁，我都知道喎，不如等我講。
高仁：OK！無問題。
低價購CB為花紅
程更計：當民企要發行CB集資嘅時候，呢間「賊投行」會幫手砌隻CB嘅terms，但佢之前可能會透過I3P（Independent Third Party，獨立第三方）喺market暗地裏「質低」公司個價，之後又會要求老總以低兌換價發行一手貨畀佢認購。
戴孤劃：咁都好正常，有著名投行肯入股係信心保證，民企老總蝕底啲都冇計。
高仁：但實情是，呢間「賊投行」本身派B仔（Bonus，花紅）嘅policy好奇怪，佢係以投資嘅unrealized gain作為分紅標準，而唔係一般投行以cash return作為準則。
程更計：所以，呢間「賊投行」嘅「唉賓」幫民企砌隻CB出嚟，佢哋再以低兌換價買一手貨返嚟，完全唔係為民企或者老總設想，只係為咗方便日後可以收多啲B仔。
高仁：仲有，「賊投行」嘅「唉賓」喺年尾攞B仔前，聽聞仲會幫民企老總踢個股價上去㖭。可惜，「唉賓」攞完B仔後，因「賊投行」要realize gain，所以會喺market大量出貨，後果「你懂的」。
戴孤劃：嘩，咁即係啃完鬆啦！？
高仁：如果唔係咁，點會叫佢做「賊投行」喎！
程更計：戴Sir，我哋醒咁多好料畀你，淨係得高仁有燒鵝左髀食，我冇嘅？
戴孤劃：夥計，即刻幫手落單叫多一隻燒鵝左髀，等兩位「鐵哥們」可以繼續爆料。
（飯局未完，下周續）
本欄逢周一刊出。
歡迎交流上市公司的財技個案及招數，請電郵至[email protected]。
訂戶登入
| 下一篇： | 百億關連交易 黃光裕勁着數 |
| 上一篇： | 中國支付通引資 搞網融睇3.5元 |
