熱門:

2015年5月27日

麥狄文 金融街密語

控股股東出粒糖贏間廠

上個星期魚缸裏頭最矚目當然係漢能(00566)暴跌後停牌,翌日輪到高銀孖寶——高銀地產(00283)同高銀金融(00530)大玩笨豬跳,此舉似乎未有嚇怕股仔炒作,每日繼續有無厘頭爆升股以數十個巴仙升幅登陸升幅榜。

漢能大股東一早平價入貨

其實,漢能爆煲係遲早問題,只不過人總係敵不過貪念,大戶略施小計,就引到貪心鬼落搭。大概個幾月之前,魚缸已有傳聞漢能要再炒上15元,皆因中國大媽對漢能此股奉若神明,兼且漢能一直被鬼佬沽空機構對準窗口沽空,缸邊友深信漢能為咗打贏中外大戰,定必將股價有咁高挾咁高,務必要令鬼子佬輸甩褲。尤其當缸邊友見過漢能股價曾升越9元高位,再喺7元至8元之間橫行,以為七個幾呢啲價位相當穩陣。加上爆煲前該公司曾以每股7.18元回購3372萬股,大嗱嗱使咗2.4億元,眾人見到公司咁大手筆,唔單止放心坐住手貨,唔少仲加碼等炒高挾沽空。

人總係只睇到好嘅一面,往往忘記公司自2010年起的5年間,大股東與其相關人士以每股均價「一粒神」、大概43億元認購咗超過240億股漢能,區區43億元打造千億市值股份。人哋成本「一粒神」,即使股價隊到1蚊雞,依然有10倍利潤喺手,所以阿Man從來未有參與過漢能股份炒作。到上周三漢能爆煲,阿Man依舊隔岸觀火,話之隔離左右班炒鬼炒到出煙,期間口多講句「小心停牌」,豈料開口中,令炒鬼以極為怨恨眼光報之。

和協海峽同一伎倆

咪以為漢能呢啲故仔獨一無二,無獨有偶,上周三無厘頭狂升五成嘅和協海峽金融(00033)又係出粒糖贏間廠嘅例子。該公司喺上周二收市公布行使咗32球CB(換股債),每股行使價為1.25元,較當日收市價0.19大幅溢價超過500%,就係呢張「翌日披露表」吸引大量炒鬼埋枱喪炒,上周三股價單日升68%。咪以為炒高68%就夠皮,周三收市後又再整多份「翌日披露表」,同樣以1.25元行使CB,數量更超過200球,就係接二連三高價行使CB,刺激股價喺上周四再炒高至「四粒神」。當炒鬼仲以為「四粒神」係接平貨就大錯特錯,事關該公司早於今年2月就以每股0.1元配售咗40億股,連同當時又係以1.25元行使1.36億股CB,控股股權易手。計計埋埋呢幾條數,新控股股東手上嗰四十幾億股,成本拉勻不過每股「兩粒神」左右,即係上周四高位剛好係大股東成本價一倍,去到嗰個位行人止步好正常。雖然跟住呢兩日和協海峽仍有零星炒作,但當唔少炒鬼計清楚條數之後,就知道大股東以1.25元行使CB,不過又係另一種惹人炒作嘅伎倆。只不過行使呢批CB後,和協真金白銀收番幾億現金,加上大股東胃口冇咁細,斷估一倍升幅未夠喉,計埋批新股同CB,家陣市值廿億唔夠,要再炒上無可厚非,實難以同過千億市值嘅漢能相提並論。

本欄逢周三刊登

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads