熱門:

2015年4月29日

麥狄文 金融街密語

傳銷團隊打造千億股份

相信大家都有發覺近呢大半年港股出現唔少股價以十倍計算嘅股份,當然可以炒高以十倍計算嘅股份,通常都有幾個共通點,包括市值低,發行股數少,股權高度集中,接近無街貨,咁莊家收乾晒街貨,然後再喺市場交波,股價自然可以天比高。

可惜呢種老式打莊手法有個唔好處,就係好睇唔好食,即使股價舞到天咁高,但由於買家沽家都係自己友,要成功散貨套現簡直難過登天。過往一貫做法係大幅折讓五六成,然後搵啲「鬼基金」接貨,當然肯接貨嘅「鬼基金」亦會承諾唔出貨,咁股價就可以持續半天吊,維持高位,莊家亦可沽出部分貨套現。

提取現貨 拿去農村賣

不過,呢種手法好睇唔好食,一來要搵到接貨「鬼基金」,二來自己個場又唔夠熱鬧,甚至好易被缸邊友定性為「鬼股」一隻,一旦散水股價將會高台跳水好難睇。最近就有隻半新股「雨遮王」被納入呢一類天價股。

要好睇又好食,能製造雙贏局面,阿Man都要向強國莊家致敬,畀佢哋度到股票傳銷呢條橋,既能成功套現製造源源不絕嘅cash flow,又可以將街貨成功派出兼維持到股價愈升愈有,正正係用股票傳銷呢一招!

套回現金再掃貨推高股價

話說唔知乜邊個醒目,諗到將股票提貨,莊家掃貨後就提出現貨,然後一張又一張嘅實物股票,通過物流運往內地多個二線城市嘅邊鎮村落。通常呢類村落正處於城鎮化階段,即係村民對股票投資仍一知半解,對北水南調投資港股更加係盲椿椿,呢個時候傳銷團隊發揮其作用。傳銷員將會透過互聯網向村民介紹港股,咁當然係佢哋要推銷嘅目標股份,並會透過報價系統向買家開價,即時將現貨出售,村民認購一張又一張股票後,亦會同時向傳銷員付鈔,呢個係傳銷股票流程第一步。

傳銷團隊之後再將收現鈔交回莊家,當然會扣除佢哋應得嗰份佣金,莊家將收回茄薯後,又再喺市場掃貨,股價自然又被推高,同時莊家亦會再提現貨。由於股價愈升愈高,已買嘅村民就會歡天喜地再轉告其親朋戚友,如是者傳銷團隊又可以成功再出貨,而持貨村民基於儲蓄心態,持有實貨股票當係存摺一樣,每日查一查報價系統,見股價又升自然瞓得安心。呢種做法令莊家可以吸乾街貨同時,亦能成功套現,股價自然可以愈掃愈高,到一日街貨索乾而現貨已提取又冇人沽貨,股價自然可以高居不下。

或者有人問阿Man,持貨村民要套現點算? 銷售團隊亦有售後服務,當村民真金白銀買咗實貨,sales係會安排股票喺過戶處轉名,所以當村民想沽貨,係可以透過broker出貨,但就需要開番個港股通戶口或者直接嚟香港開戶。呢個程序大大話話要花三幾個星期,呢段期間莊家已將上述流程做咗幾次,股價亦可以已翻咗幾番,零星沽貨亦唔會拖累股價插水,當然回調一兩成亦難免,至少唔會高台跳水。聽講用呢個方法已成功製造兩隻千億股,包括全國數一數二首富嘅「太陽神」同埋具有明星效應嘅「格格影業」,後者市值近日重返千億之下,但最勁嗰吓確係千億股一隻。

本欄逢周三刊登

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads