熱門:

2015年4月1日

麥狄文 金融街密語

「太陽神」鬥贏空軍靠演技

之前,阿Man同大家講過有關沽空機構手段有幾卑鄙,手法猶如金融強盜,唔少上市公司都中招,上星期就啱啱有個受害者「清涼水」復牌。據聞管理層喺復牌前做咗唔少功夫,密密同機構投資者開咗幾輪電話會議,清楚交代營運情況,最終得到呢班捧場客支持。

八卦公爆料復牌當日指揮官有晒策騎指示,希望守得住停牌前價格,「清涼水」最終亦能超額完成,錄得升幅散場。不過,沽空機構好似仲未肯認輸,再部署整多份加強版唱衰報告,而加強版出街前,「高佬盛」出咗份報告維持其投資評級。家陣雙方勝負未分,純睇股價表現,暫時沽空機構未嘗到甜頭,「清涼水」領先一個回合。

好似「清涼水」呢類受害者唔少,而成功打敗沽空機構嘅勝利者亦唔係話冇,最厲害要數「太陽神」,唔單止打到班沽軍落花流水,仲要成為強國首富咪話唔巴閉。咪以為「太陽神」挾瓜班沽空軍純粹鬥錢多,當中過程唔係間間公司做得到,單係呢一點阿Man真係要向「太陽神」班管理層同強國指揮官寫個服字。一般人都以為「太陽神」股價大飛天,係同班鬼佬基金互片有關,之前有故仔講過「太陽神」因為有幾個fund相互之間發行唔少option對賭,衍生工具觸發冚倉,喺街貨有限嘅情況下,強國莊家坐收漁人之利,贏到開巷。

扮借錢 自導自演大龍鳳

查實呢批鬼佬基金之所以發行咁多衍生工具,完全係睇死「太陽神」啲業務全屬吹水,又有唱衰報告指公司造假,唔會交到成績表,該公司更一度更被缸邊友冠以「鬼股」呢個污名。查實公司形象咁曳,完全係一套自導自演大龍鳳,話說喺年幾前「太陽神」班管理層四出向啲企業賓架度水,大大話話見咗四十幾間金融機構,透過share financing借錢,成功為公司「建立」一個極之手緊嘅形象,惹來沽空機構同各路對沖基金注意,諗住沽爆「太陽神」食大茶飯。

誰知「螳螂捕蟬,黃雀在後」,以強國私募基金為指揮官嘅強國部隊早已作好部署。結果管理層call off咗單借錢deal,一場完美另類「逆向路演」落幕,強國部隊一吹雞入場,三兩吓手勢已將街貨買乾,強國部隊不費吹灰之力,就挾瓜咗班空軍。之後劇情發展到幾個fund之間嘅option互相廝殺,股價更加係一去無回頭。呢個故仔話畀大家知,家陣要食大茶飯唔單止要識玩財技,原來仲要靠管理層有演技。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads