中聯重科的故事與數據

中聯重科（01157）是一間於內地生產重型機械的大型企業，產品範圍廣泛，如混凝土車、起重機、路面及樁工機械等；上市後不久大受追捧，2011年時股價升至17元以上，營業額432億元人民幣，純利超過79.9億元人民幣。

時至今日，中聯重科風光不再，股價跌至5元左右，營業額及純利每況愈下，2015年1月19日，中聯重科發盈警，預告2014年全年純利倒退，降至介乎7.6億至11.5億元，比起高峰期，跌咗九成。持貨者一殼眼淚，投資者如今只有遠觀，而不敢褻玩。

負面報道後業績走弱

一間公司業績好與壞，其實有跡可尋。

話說內地報章《新快報》有一位記者在2012年9月至2013年8月期間，刊登了多份中聯重科的造假報道，內容大概指該公司涉嫌自製客戶、誇大營業額；其調查報道繪影繪聲，令聞者震驚，聽者愕然：一家有國企背景的中國重型機械龍頭公司，竟然都會造假？

答案是：「當然唔會啦」。2013年10月，該名爆出中聯重科造假新聞的記者被帶走調查。之後仲被落案起訴，罪名是涉嫌損害商業信譽罪。結果，該名記者被吊銷新聞記者牌照，判監1年10個月，該記者向民警承認，他受人錢財，發表失實報道。事件就此完結。

可能一般讀者都覺得故事完了，一切水落石出，但其實此案中尚有多個疑點並未解開，亦再無人深究，例如到底是什麼人畀錢記者刊登失實文章，最後又邊個得益？Short sell中聯重科的券商？報社刊登這稿前沒有確認事件真偽嗎？

上述發生嘅事，只是中國社會中的典型事件，類似情況，屢見不鮮。我唔係想發表我對中國特別的資本主義的睇法，但空穴來風，未必無因。中聯重科上市初期，一直表現良好，業績逆市走強，股價節節上升；直至造假報道刊發，公司似乎只是記得澄清，而唔記得咗生意點做，正如文章開頭講，營業額及純利大幅倒退，點解會咁？好簡單，你被人篤背脊，話你考試出貓，唔理你之前真是有出貓又好，無出貓又好，到下次考試，入到試場，監考嘅知道你係嫌疑人，仲唔睇實你？你仲敢出貓？

大部分香港讀者鍾意聽「冧把」，睇股評人分析股票前景。講完一堆故事，我也講吓數據。

應收賬周轉期特長

截至2014年第三季度，中聯重科應收賬款周轉天數為518天。這代表中聯重科從把機械售賣給客戶後，需要518天時間才能把賣這台機械的款項「收到手」；其他行家，大型的如美國Caterpillar和日本Komatsu，其應收賬款周轉天數是115天；同系中國重型機器生產商三一重工，都是用300天左右，即是話，500幾天先「收番條數」，唔係「中國獨有國情」。

分析還分析，賺錢先至係做生意的目的。中聯重科初步估計2014年全年賺7.6億至11.5億元人民幣。睇落都唔錯呀，起碼都唔使蝕，亞視蝕咗咁多年，都是到近期先無錢出糧，中聯重科有錢賺，應該頂得住啩？

各位讀者，數字歸數字，純利只是賬面利潤，會計概念講到賺錢，當然是現金流行頭。回顧中聯重科未經審核的第三季現金流量表，發現該公司從經營活動及投資活動，完全不能帶來現金流入，2014年首三季就燒咗70億元人民幣。不過唔使怕，因為中聯重科首三季就借咗過百億，最少肯定有錢出糧先。

不過，以中聯重科每做「一單刁」要500幾日先收番錢嘅速度，加上借錢要還，仲要計息，若然銀行突然關水喉，中聯重科會有什麼後果，留待讀者自己慢慢諗。

筆者是證券投資持牌人。筆者及與筆者有關的戶口持有以上股份及相關衍生產品權益。

筆者曾寫過的漢能、德祥地產、丹楓、華南城等等都是個人資產管理過程和實戰的感想。對或錯，市場定；不是紙上談兵。