對人對己一視同仁高要求

恐懼源於未知，經歷人生高山低谷的伍珮瑩（Jenny），練成克服恐懼的能耐，「我成日教啲女，一定要acknowledge fear（承認恐懼），就算有fear都堅持去做；好似我第一次叫佢哋坐過山車，佢哋驚到死都唔搭，而家搭得好爽，愈驚嗰啲愈要試，因為知道同相信係安全。」

「坐過山車咁爽，主要係你經歷過嗰種『危險』，可以好安全落返嚟，會好開心；我經常同自己或者啲女講『我知你好驚，但一定要行，要諗下最壞情況係點』，總之一定要overcome your fear（克服你的恐懼）。」Jenny解釋。

教導女兒「愈驚愈要試」

她承認本身性格對人對己有很高要求，「啲女都會唔鍾意，其實最緊要教佢哋做人，咩都試，成績反而唔係最重要，我當然想成績好，因為係對佢哋好，但更想佢哋努力嘗試；譬如投訴某個老師教得差，我咪提議用其他方法，或者直接話畀老師聽，你無得選擇換老師！呢個世界咁多人唔好，唔通你換晒佢咩？」

正如現今的部分年輕人，往往因為跟上司或同事不咬弦，輕易就拂袖「東家唔打打西家」。

Jenny笑言見過不少：「我公司都有啦，唔同職級都有人話，唔鍾意周圍啲人，唔做喇；我心諗，你去到邊都一樣。」

「我同啲同事講，跟着我係辛苦嘅，不過只要你肯學，我一定願意教；我做嘢永遠交足貨，每件事、每個細節都認真做。大部人返工係做六成，做八成（公司）已經好開心，我做夠你100%，甚至超出你預期，人哋會睇得出。」她形容世界很公平，每人一日只有24小時，只要多花一小時玩手機，就少一個鐘頭為事業奮鬥。

人各有志，Jenny表明不認同「工作與生活平衡」的理論，認為只屬商家鼓勵消費者吃喝玩樂所創造的概念，惟不會肆意批評，「你可以揀hea，老細叫你做乜就做，我公司亦有呢啲人，所以如果有20%好似我呢類（做足100%）同事，我已經感到好滿足，呢類人一定唔會多，咁先至係人才，另外就係要設計一個工作模式出來，適合其餘80%的同事。」

搬公司既為吸才亦照顧下屬

工作要求雖高，但她同樣關心同事，草莓網近月展開總部大搬遷，由使用了超過10年的港島筲箕灣阿公岩村道草莓大樓，搬往觀塘宏利金融中心，「係好大嘅決定，所有人都覺得我儍，之前嗰度大啲，成座（物業），而家呢度仲貴啲，點解要搬？為咗人才囉，以前嗰度太隔涉，我揸車就方便，其他同事由地鐵站行去要15分鐘，無瓦遮頭；我相信大部分同事搬嚟新office都開心咗。」

下一篇：	臨危受命革新營銷面向全球
上一篇：	伍珮瑩經歷雙打擊 10年浴火重生草莓網行政總裁憑意志信念前行

文章：