熱門:

2023年3月13日

周一人物

徐家駒三十年設計生涯滿經典
廣告形象做出成績 急流勇退教書辦學

設計師屬很多人心儀的職業,覺得有型又夠潮,且可發揮個人創意,然而現實當然沒那麼簡單;香港設計學院校長兼行政總監徐家駒(James)上世紀九十年代入行,由廣告設計做起,其後成為資深形象設計師,替人「改頭換面」,繼而「工而優則教」,多年來積極為本地培育設計人才;他早前接受本報專訪,暢談行業變遷和挑戰。

跟很多熱愛美術的年輕人一樣,James從小喜歡繪畫和動漫,他笑言可能屬隔代遺傳,「爸爸係公務員,爺爺從前好鍾意書法美術,雖然其實我無見過佢(祖父),只係聽阿爸講,或者有少少咁嘅(美術)基因。」James自言中學時期無心向學,沉迷畫公仔,教科書滿是塗鴉,後來追隨一位退休大學美術教授正式學習傳統素描、水彩油畫。

決心走美術這條路,他會考之後入讀明愛白英奇設計學院,主修廣告及商業美術,接着順理成章在傳統廣告公司工作,除從事平面設計,偶爾亦協助拍攝廣告硬照和影片,為他後來涉足美術指導及形象設計範疇奠下基礎,「嗰陣廣告算係最hit(熱門)工種之一,大家覺得好有型,可以成日接觸靚人靚事,又有得見明星,啱晒我哋呢啲『貪慕虛榮』嘅人,哈哈!」

難忘趕製蔡少芬婚紗小帽

James入行的九十年代初,正值本地廣告業輝煌時期,經典作品湧現,例如鐵達時手錶、萬寶路香煙、人頭馬干邑等,相信至今仍令人印象難忘;行業興旺,廣告人轉公司屬家常便飯,「做一兩年又轉,呢間5000蚊(月薪)、嗰間出一萬,成日跳槽。」

那些年,一條電視廣告片,往往持續播放以年計,故商家都樂意投放大量資源,營造品牌形象,當年James接得最多的項目就是婚紗,「婚紗公司比較多資源,因為利潤好高,每對新婚夫婦幫襯十萬八萬,(廣告)budget(預算)好大。」

他較難忘是藝人蔡少芬與吳奇隆「情侶檔」婚紗廣告;話說James原本在雜誌發現一頂白色小帽,覺得適合蔡少芬拍攝時佩戴,遂向婚紗公司老闆娘推介,對方不置可否,他亦不了了之;詎料拍攝前夕,老闆娘才突然堅持要有那頂帽,十萬火急,James只好與團隊通宵達旦趕工,用紙造成,配以蕾絲花邊裝飾。

急就章質感難免有落差,「肉眼睇易察覺,影相個質感會淡化咗,加埋少少角度(遷就)就唔多覺,用咗我一整晚時間,總算過到骨,你知以前無得P圖(修圖),一定要用實物,最多稍為執少少;嗰間婚紗公司之後都有搵我,做過兩屆香港小姐服裝形象同設計造型。」

年紀大易遭客戶質疑落伍

到了九十年代中後期,James有感「一味」做設計工作過於單調,適逢閱報看見有教育機構招聘廣告,請人教平面設計,膽粗粗去應徵,「我都鍾意講吓理論,當作freelance(自由職業)試吓,同埋freelance教書嘅人工,其實高過設計嘅freelance(笑),於是放咗工夜晚去教書。」教學生涯在觀塘職業訓練中心(已停業)展開,後來加盟香港設計學院至今。

在廣告界打滾多年,James逐漸把工作重心移向教育行業,只因看得通透,「廣告係好trendy(時髦)嘅行業,做到咁上下年紀,就算你覺得自己仲係好潮,啲客都會質疑『喂!你三十幾四十歲仲創作啲後生仔嘢?』,認為你out(落伍);我見過好多前輩做做吓畀公司降職,心諗廣告似乎做唔長久,教書好啲,同埋嗰陣又教得幾開心,就索性做全職,freelance變咗廣告同形象設計。」

時移世易,互聯網興起,顛覆廣告與形象設計業,他指出,隨着傳統媒體沒落,大型電視廣告買少見少,形象設計也愈趨難做,加上大量網紅及KOL(關鍵意見領袖)在各式各樣平台湧現,「唔使美術指導同咁多靚衫啦,佢哋做直播着返自己衫已經得,形象設計師嘅功能性同重要性低咗好多。」

「觀眾睇KOL,反而係鍾意見到佢哋真實一面,(KOL)做自己先至受歡迎,無必要模仿其他人;你諗吓喺屋企做直播,無啦啦着到好grand(隆重)咁仲奇怪,可能着件睡衣已經好多人like(點讚),當然套睡衣背後或者都係精心揀過襯過,只要出到嚟(效果)自然,啲觀眾就唔覺(突兀)。」James解釋。

未來有意推出藝術玩具

做過不同行業的他,被問到「最愛是誰」時表示,以往偏愛教學,「可惜我愛佢(教育行業)佢唔愛我,都無生意【見另稿】,而家就最愛做形象設計,雖然錢唔係搵得多,但可以接觸多啲人,擴闊視野,工作性質比較多姿多采同有趣;如果純做廣告,通常係匿埋喺工作室自己創作。」

談到未來目標,James期望在設計方面多作不同類型發展,「始終設計學校一定走下坡,唔會點樣反彈,我本身有畫吓畫,最近同一個做外賣App嘅朋友合作,搵我畫嘅公仔變成佢個App嘅卡通角色;我亦打算將來出啲art toy(藝術玩具),嗰個市場好大,不過所需嘅資源都唔少,睇吓搵唔搵到投資者一齊做。」

已故法國時裝設計大師Yves Saint Laurent曾講過:「時尚會褪色,風格才是永恒。」相信只要有個人風格,也能在不同的作品展現出來。

採訪、撰文:許鎮邦

攝影:黃勁璋、被訪者提供

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads