《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2023年2月20日
港人平均壽命冠絕全球，對安老服務需求有增無減，社企尊賢會創辦人、社創新動力創始董事兼主席張瑞霖（Patrick），近年積極關注相關議題。本身為成功企業家的他，2006年因一場大病，癒後毅然放下如日中天的商業王國，全情投入公益事務，心願是協助一班「50+」黃金歲月人士，建立正面樂觀心態，迎接有質量的人生下半場。
Patrick於人生上半場走的是典型商界跑道，工業工程畢業後做過幾年工廠，接着轉職跨國企業，逐步成為管理層，負責亞洲區銷售業務。然而人算不如天算，遇上人生首個轉捩點，驅使他辭職創業，「美國總公司嘅要求，同我（當時）諗緊嘅管理方法有啲唔同，我一直覺得員工同我哋（管理層）應該『共同創造財富』，（公司）賺到錢應該反饋畀佢哋。」
「其實公司對我好好，送我去（美國）哈佛（商學院）讀書（管理發展課程），但嗰年我喺哈佛，公司經歷leveraged buyout（槓桿收購），我被CEO召去總部，話公司每年畀同事嘅Christmas Bonus（聖誕獎金）要取消，然後又諸多動作，傷害到員工利益，CEO自己就梗係有Golden Parachute（黃金降落傘，一種補償協議），大把錢，我當時覺得咁嘅老闆跟唔過。」Patrick憶述。
內地曾擁5廠 軟包裝材料龍頭
「皆因牽涉價值觀問題，我最關心整個團隊是否得益」；道不同不相為謀，1992年Patrick自立門戶，在內地設廠生產軟包裝材料，很快闖出一片天，「當時呢個行業喺國內好稀缺，基本上唔使（主動）賣嘢，係啲人嚟求你畀貨佢，第二年已經有錢賺。」
創業一帆風順，此後15年間，累計營業額發展至逾10億港元，擁有5間廠房，成為行業龍頭，「就係太成功，壓力好大，去到一個地步發覺自己唔再係自己，壓力大到唔可以有耐性聽人講嘢，同埋個人好驕傲，獨斷獨行，成日鬧人。」
直到2006年，踏入50歲的Patrick迎來人生另一次轉捩點：某天公司會議期間他突然暈倒，檢查發現有腦瘤，嚴重至已壓死嗅覺與一半視覺的神經，要立即動手術，「之前有先兆，近視加深，不過我無特別留意，以為只係多嘢做唔夠瞓，完全接收唔到身體訊號。」
不做魔鬼老闆 尋回創業初心
當年一心只顧事業的他，手術後醒來第一件事問妻子，「我個Blackberry（黑莓手機）喺邊？覺得無咗我，聽日公司會冧。」那場大病令他要接受兩次手術，在病榻上休養半年，「結果公司無冧，反而生意仲好咗，同埋當你靜落嚟問吓人，先至知啲同事原來咁憎你。頭先我都講，創業動機係為同事，想共同富裕，到頭來自己做老闆竟然咁神憎鬼厭，呢個唔係我想要嗰個我。」
患病聽來不幸，Patrick竟感到是難得「重生」機會，「我生意咁成功，正常係無可能有咁嘅時間畀我休息同反思（人生），嗰段日子我反思一個問題：『到底乜嘢令我開心？』呢樣好critical（關鍵性），我發現原來賺錢唔係開心，當時都叫夠錢用啦，但5間廠邊個幫我管？問吓個仔，佢話：『你留返啲錢畀我啦，廠就不必喇！』哈哈。」
既然兒子不願接班，Patrick遂將業務全數出售，重新尋找喜歡的人生路，「發現自己都係鍾意幫人」，於是立志投身公益事務，同年出任苗圃行動財務董事，在內地從事山區助學，並負責機構的全國行政工作及管理團隊，「之前喺商界做慣波士，一言堂全部拍晒板，公民社會講平等，每個人有一樣嘅發言權，苗圃行動絕對係忠實執行者。」
「喺嗰度任何人都可以問你一堆問題，要你解釋，開親董事會都開到凌晨，但就學識咗謙遜，放低自己（身段）。」在苗圃行動工作兩年，他有感好像荒廢以往的商場經驗，未免可惜，2008年接觸到跨國社企「黑暗中對話」，對方當時有意進軍香港，Patrick覺得可善用本身商業及公民社會經驗，結果一拍即合，協助把該組織引進。
隨着「黑暗中對話」在港業務漸上軌道，建立到可安心交棒的團隊，他又想尋求新挑戰，「嗰陣五十幾（歲），過咗半生，不如學吓做養老（事務）；既然放棄咗（追求）財富同咁大嘅事業，我要搵到條路，令我好開心咁度過未來四五十年。」其後他分別於2012至2021年間，創辦尊賢會、社創新動力及創伶滙，積極關注安老事務【見另稿】。
冀為長者提供理想養老環境
很多快將踏入退休年齡人士，往往對「退休」聞之色變，Patrick認為這兩個字代表人生進入另一條跑道，要時間準備，「心態、價值（觀）改變，係好緩慢嘅過程，你如果仲帶住以前職場競爭向上爬嘅心態，係全錯！會死得好慘，所以50歲開始就要諗。」
談到未來目標，他直言最想改變外界對老年的負面印象，不一定與衰老、孤獨或疾病有關，「我身邊有唔止一個活生生例子，一日到黑擔心有病，全港公立醫院部門都睇勻，食飯又樣樣唔敢食，人生仲有咩樂趣？呢啲係好負面嘅健康awareness（意識）。」
「香港人一提到安老，就話要捐多啲錢，起多啲安老院，照顧啲獨居老人，嗰啲係要幫，最緊要係佢哋日子過得開唔開心；而家好多theory（理論）都講，即使（長者）住喺安老院，亦盡量畀自由（度），佢哋做得到嘅嘢，盡量畀佢哋做。」
Patrick闡釋：「大部分行動不便嘅老人家，唔太鍾意畀人服侍，盡力想自己做，但安老院講效率，換（尿）片係某個鐘數劃一咁換，唔理你有無『瀨』，嗰啲唔係佢哋想要嘅環境。」他期望，香港可為像自己這些曾在社會發展作出貢獻的「baby boomers」（嬰兒潮一代）提供理想環境，讓他們過一個有質量的晚年。
採訪、撰文：許鎮邦
攝影：黃俊耀、受訪者提供
訂戶登入
| 下一篇： | 母親樂享晚年 啟發設尊賢會 |
| 上一篇： | 人工智能助理10秒誕8時裝圖則 |
