法學博士不愛做律師

董彥鈞在希慎興業（00014）工作至今15年，相當長情，原來從前他是「職場浪人」，從事過不同行業；從美國賓夕法尼亞大學凱里法學院（University of Pennsylvania Carey Law School）法律博士畢業後，首份工在夏威夷當律師，理由卻是，「知道自己唔係好鍾意做律師，就搵笪全世界最開心嘅地方去做，朝早滑下浪，下晝可以早啲放工，我一向覺得人生唔應該只係工作，仲有好多嘢可以發掘。」

曾任職電視台馬會

大學本科主修傳理的他，自知非做律師材料，1993年回流香港，決定回歸初心，投身最愛的傳媒行業，先後在電視廣播（TVB）、有線電視和亞洲電視擔任英文台記者及主持時事節目等，1999年轉投合併前的期貨交易所企業傳訊部，翌年加入香港賽馬會，出任見習騎師學校校長3年，也曾負責馬會慈善事務工作。

做校長與其法律及傳媒背景，聽來風馬牛不相及，不過Mark形容所得經驗終生受用，「要deal with（處理）一班十零歲、可能讀書未必咁叻嘅少年（見習騎師），或許體育好叻但細細粒，點樣引導佢哋喺短短幾年內，由一個喺傳統學校入面唔太受重視嘅學生，變成世界級運動員？呢方面我當然無陳念慈（現任校長）咁叻，佢本身都係世界級運動員（前港隊羽毛球代表）。」

令Mark倍感安慰的是，當年幾位學生如蔡明紹、梁家俊等，如今已是馬圈中堅分子，在騎師排行榜成績超卓，「我喺嗰度學到好多同自己成長背景好唔同嘅嘢，學識點樣同以往未接觸過嘅人溝通、有同理心、懂聆聽，對我而家工作好有幫助。」

職場上兜兜轉轉，Mark終「情歸」希慎，固然出於本身對銅鑼灣的情意結，「一聽到希慎有呢個job opening（職位空缺），我真係義無反顧（申請），覺得終於有呢個機會可以返嚟呢個區，雖然馬會都只係喺隔籬（跑馬地），哈哈！」

「之前喺馬會做慈善（事務），當然有佢吸引之處，幫到社會，而家呢份工實在有太多社區活動，太多嘢玩，原來同社區合作咁開心。」每次協會舉辦活動，參加者全情投入，身在現場的Mark「看有多少生疏的臉，默默露笑容」，那份滿足感難以言喻，「好多時活動完咗，我望住個天會諗，有份工可以令到人哋咁開心，你話幾好。」

放大圖片 / 顯示原圖

下一篇：	擇居利園區如置身城市綠洲
上一篇：	利園協會董彥鈞情牽銅鑼灣連繫商戶共建社區凝聚人情味

文章：