Zenecom雷劍烽拓健康產業生態圈
前籃球員因傷轉行闖新領域危轉機

傷病是運動員最大敵人，惟有時塞翁失馬，焉知非福，只要心態正面，危機可變契機；像Zenecom（牽你康）集團行政總裁雷劍烽（Roy），曾是香港甲組籃球運動員，2007年不幸遇嚴重傷患，結果反「造就」他決心轉戰商界，專注發展資產管理，其後涉足營養補充品生產、跨境電商平台業務，今年正式進軍元宇宙領域，冀做到環環相扣，發揮協同效應。

Roy讀建築出身，畢業後反而投身金融界，由前線經紀做起，理由簡單直接 ──「（金融業）搵錢快啲嘛！哈哈。」入行後不久已考取所需牌照，2011年決定自立門戶，開設資產管理公司，進軍內地市場，主攻北京、上海、廈門、南寧、成都等大城市。

初設資管公司北上開荒

北望神州不易，他憶述當年在廈門開荒，遇過不少挑戰：「初時啲福建人當唔想聽你講嘢，就同你講閩南話，所以我喺廈門留得最耐，有兩年幾乎係長駐，好多嚟香港上市嘅（內地）大公司總部都喺福建，嗰兩年我成功接觸晒佢哋，雖然生意唔算話做得好好，始終唔係自己人，但我完全無後悔，攞到好多好寶貴嘅經驗。」

至於與營養補充品結緣，源於2017年一次偶然機會，他有位生意夥伴兼前輩「無啦啦話買咗條formula（營養補充品配方），問我有無興趣，我話『既然你連formula都買咗，咁就一齊搞囉』，其實嗰條配方我幾buy（認同），叫『三重幹細胞（膠原蛋白粉）』，（放在）脷底服，可以補充成年女士流失咗嘅骨膠原，當時做過啲研究，覺得有得搞」。

攻營養產品辦跨境電商

籃球員出身的Roy深明商場如球場，出手講求快而準，既然有「秘方」在手，加上覺得營養補充品市場的前景樂觀，遂與拍檔創辦Zenecom，一開始從事健康產品及藥品生產，其後逐步展開跨境電商業務，並推出連接大灣區的線上跨境大健康電商平台，以及打造在線醫健美專家顧問應用程式等。

直到今年，Zenecom旗下多媒體有限公司Zenecom MCN正式成立，多角度發展網絡零售新領域，包括一站式提供內容創作、影片製作，網紅資源及行銷市場推廣等，並進軍元宇宙領域【見另稿】，Roy形容整件事順理成章：「我哋由supplements（營養補充品）開始，跟住跨境電商，之後就要諗點樣落地，好自然就做marketing（推廣），其實係延伸落嚟嘅business（生意）。」

事業上不斷涉獵新界別，就如籃球員一直轉換位置，Roy坦言有難度，「相當大分別，直到而家都仲會吃力，畢竟自己以往做開金融，喺某啲範疇都算係『呢面嚟，嗰面去』，而家呢啲始終屬於實業，完全兩樣嘢，辛苦囉，但睇住公司一步一步（發展），值得嘅！金融（生意）我無放棄到，由於有好好嘅兄弟拍檔幫緊手，唔使我太費心。」

旗下業務緊扣協同發展

由營養補充品到跨境電商，以至最新的元宇宙，Roy認為企業家永遠有種市場觸覺，「Smell（聞）到係時候喇，咁就入去（相關市場）囉。」然而萬變不離其宗，他形容集團旗下多間公司雖然獨立發展不同業務，不過，歸根究柢也是專注大健康產業，因此每間公司環環相扣，互相聯乘，發揮協同效應，共同實現集團「牽引生活，專注健康」的核心理念。

如今生意頭頭是道，時光倒流20年，時為本地甲組籃球隊「安青」一份子的他，也曾夢想成為職業球員，在場上發光發熱，「可惜香港嘅運動發展無乜support（支持），我哋當年不知幾想有職業（籃球），嗰陣甲組基本上得南華、永倫，仲要只係半職業；既然無職業，（球員）自然要諗之後出路，唔會淨係一直打波。」

2007年，Roy在一次比賽中受傷，導致十字韌帶斷裂，聽來不幸，他視為告別球場時機，把心一橫，索性暫不做手術，全情投入當時的資產管理工作，直到一年多後才「開刀」，「諗返轉頭反而十分慶幸，如果唔係嗰次（受傷）我根本放唔低（籃球員生涯），當然之後仲有keep住打波，不過呢兩年就甚少，一來（新冠）疫情，二來（工作）真係忙。」

傷患只是人生小障礙，成功的路也不止一條，能化危為機，條條大路可以通羅馬。

採訪、撰文：許鎮邦

攝影：黃勁璋、受訪者提供