難忘為家駒梅姐造祭品

投身紮作40年，夏中建作品多不勝數，包括曾為樂隊Beyond已故主音黃家駒造紙紮鋼琴，以及已故天后梅艷芳喪禮上的2米乘2米「迷你紅館」等，「Beyond（黃家駒）嗰個直情係1比1演奏級大鋼琴，我專登走去教會，用把尺度佢哋個三角琴大細，再返嚟照做。（梅艷芳）紅館做好之後就要拆件燒，否則入唔到火爐。」

被問到困難之作，他形容所有要按別人要求造的都有難度，「畀咗個規範你，好似今次（中環花燈）咁，講明去到幾多米（高闊）先合乎要求，唔同你隨意想點都得；其實花燈頗複雜，佢擺公眾地方，要買保險，必須迎合康文署規例，由結構工程師驗證，之後電力裝置又要搵工程師驗，驗好晒先買到保險，可以放（置）出嚟。」

首創紙紮乳豬熱賣

然而，今次夏中建製作逾13米高的花燈「高處未算高」，最誇張要數他年前為香港大律師公會的萬聖節派對在跑馬地紀利華木球會紮作的科學怪人及木乃伊，其中科學怪人足足4層樓高，「前後整咗兩個月，剩係個頭都高過我成個人，要搭竹棚，隔籬木乃伊18呎（高），高消費項目嚟，不過唔緊要，大律師大把錢（笑），我又覺得好玩。」

雖然紮作屬傳統行業，但夏中建喜歡搞搞新意思，每年創製一款新作品，最成功例子首推紙紮乳豬，「一個清明節賣十幾萬隻，幾爽呀，不過好快畀人抄。」有成功自然有失敗，譬如生日蛋糕就乏人問津，「原來好多人已經忘記先人生日，只記得死忌同春秋二祭。」

儘管熱愛工作，可是「君子有所為，有所不為」，夏中建表明有些傳統禁忌他絕對不可僭越，包括不能製作參照某人外表、影射特定對象或指名道姓的紙紮公仔，「咁樣對人唔住，會令嗰個人（被影射對象）折壽，所以絕對唔會做」，正如紙紮汽車也不會套用現實存在的車牌；還有就是黑社會入門儀式（白事除外）使用的祭品，「做嚟無謂」。

紮獅頭難跟內地鬥平

至於未來最想造什麼？成長於舞獅世家的夏中建，答案是回歸初心，「紮返一兩個獅頭，畀返自己人收藏下，我近呢20年都無造過，而家喺香港紮獅頭搵唔到食，畀晒內地啲廠做，舉個例子，一個獅頭要造6日，香港一日點都要畀（師傅）至少500蚊，就算普普通通，剩係人工都3000元。內地（日薪）200幾（港元）搞掂，我哋現時賣緊嗰啲獅頭，一套連獅被1400幾蚊，40年前要4000幾蚊。（現在獅頭圖案）仲要畫得好靚，農業大學美術系嘅同學畫㗎喎，好厲害，但佢哋只係萬幾蚊月薪，喺內地已經算過得去。」夏中建如是說。

上一篇：

回歸展13米高花燈再戰健力士

文章：