熱門:

2022年6月6日

周一人物

物流先鋒王國亮 見證港引領全球
聯邦航空貨運總裁 細訴送遞發明變遷

物流業與日常生活息息相關,香港作為國際航空樞紐,貨運能力一直處於世界領先位置。聯邦航空貨運集團(UFL)行政總裁王國亮(Simon),加入公司逾三十載,見證本地業界多項傲視全球的「偉大發明」,從排貨、包裝,以至報關方式等,均引領世界潮流。他日前接受本報專訪,分享行業變遷及其職業生涯的難忘點滴。

王國亮早年預科畢業後投身社會,第一份工在玩具廠起步,「本身只係做暑期工,但入唔到大學,又唔知做乜好,老闆叫我不如留低,於是就繼續做。」上世紀八十年代後期工廠北移,Simon亦隨之涉足內地,「負擔唔起即日來回,逢星期一至五留喺深圳,住宿舍。」

翌年Simon遇上職業生涯轉捩點,一位舊同學問他有無興趣轉職貨運,「根本唔知咩嚟,佢話有間公司想請我哋呢班中七畢業嘅人,去美國做嘢。」未出過遠門的Simon雀躍萬分,二話不說便應徵,就此與UFL結下不解緣,「老闆好好,基本上中七畢業嘅都請,做sales(銷售),其實我哋根本無資格,對個行業無認識。」

入行獲栽培 赴美邊做邊學

世上無難事。Simon抱着放眼世界、邊做邊學心態,展開飄洋過海旅程,獲安排長駐紐約,起初在曼哈頓一帶「洗樓」,向潛在客戶推銷公司服務,「無經驗,英文又唔叻,雖然讀書有學過,之前好少機會用。第一日去到,人哋同我講嘢,我識聽但呆咗唔識回應。而家諗返嗰段日子,係好有趣嘅經驗,困難兼刺激。」當年客戶以製衣業為主,其次是生活雜貨,如手錶飾物等,「嗰陣香港造手錶好犀利,不停換新款,全部空運過去(美國)。」在當地逾一年,他形容獲益良多,「個計劃實情係我哋得着多過公司,幾個老闆理念都想培育新人,因為以前做運輸行業,啲人覺得比較低下,於是老闆用呢個方法,引後生仔入行。」

九十年代初回港後不久,Simon被派駐上海,當時UFL剛進入內地市場,地區總部仍在港,「公司搵好多香港同事上去,我哋後生呢批無乜包袱同家庭負擔,四海為家去邊都得,自然揀我哋。嗰陣上海同而家好大分別,好多地方未開發,平日出入(交通)都有問題,喺機場做嘅同事仲慘,(工作地點)空調都無,夏天非常熱、冬天非常凍。」

跟之前在紐約一樣,要適應的還有語言,「我係上海人,細個聽阿嫲講上海話,稍為聽得明少少,但普通話就真係無學過,又係『半桶水』咁衝出去。」如是者一年多後他調回港,此後步步高升,九十年代後期晉升銷售經理,2000年成為香港區總經理,至2004年出任集團行政總裁至今。

創新自行裝板 技術外輸

投身物流業多年,Simon自有其體會,「呢行一路變,香港好早有貨運物流業,我哋算係本地現存頭3間最耐歷史嘅(貨運公司)。」隨着時代變遷,運送種類也與時並進,從他入行初期的服飾雜貨,後來是消費品、玩具。到千禧年前後互聯網興起,大家一窩蜂寄運電子產品,「(電子產品)價值高,絕對可以負擔寄空運。」

正因潮流變幻莫測,他不諱言業界常要面對難關,「明明做開嗰樣嘢,突然間又唔做,要轉第二樣,好多嘢要適應。」惟他強調,香港貨運能力向來屬全球一流,更有不少創新發明,以成衣為例,「通常大家諗住將啲衫包起佢,但有啲其實唔適宜包,好似絲質、高級晚裝,包咗之後,去到要燙同洗,好麻煩,香港貨運業界就發明咗garment on hanger(走掛裝),將成衣逐件掛起寄過去。」

業界另一創新作是裝板方式,即是把裝進飛機的貨物放在一塊平面集裝鋁板上,再由繩網固定,一般航空公司或貨運站都不會交由貨運公司進行有關工序,「香港同業就有咁嘅技術,保證呢啲板上到飛機(貨物)唔會冧落嚟;香港呢個市場係好罕有,可以開放畀我哋自己裝板,再送入機場。」

他解釋,由貨運公司自行裝板,好處是「裝到盡」,「都係嗰塊板,你裝得多啲,自然利潤好啲」,因此本地物流業界人人都是「層層疊」高手,「就算今時今日依然唔係好多地方肯開放(自行裝板),上海可以,係因為一班香港貨運公司帶咗人才上去,引入呢個技術,得到航空公司同(當地)海關認同,換言之,呢行好多潮流都係香港帶起。」

引入數據交換 輕鬆報關

此外,「報關難」一向是困擾全球物流業煩惱,這方面本港業界也有貢獻,「香港本身屬自由港,報關手續比較簡單,形成本地(業界)好多時面對(外地)呢啲報關上麻煩嘅地方,希望同當地海關傾到所謂EDI(電子資料聯通)報關,即係而家講嘅無紙化,嗰陣叫數據交換,做到一啲技術上嘅合作,上海海關都邀請過我哋做呢樣嘢。」

對某些人來說,物流業可能只是「將貨物從A點送到B點」,惟Simon認為,如今單靠運貨已解決不了客戶所有問題,還要提供更多增值服務,故UFL早於2014年開始進軍跨境電商業務,再在2018年成立新品牌,主攻電商物流,為網店提供存倉、執貨、包裝、送貨等服務【見另稿】。

他指出,物流過程除存倉及送貨,還涉及很多其他工序,例如包裝、標籤、退貨要求等,「電商平台唔會幫你(客戶)做,你都係要自己解決,呢啲就係所謂電商物流需求,變成咗一個我哋可以為客戶提供嘅增值服務。」

新冠疫情下,全球物流服務需求大增,供應商與客戶一交一收看似「手板眼見工夫」,實情是處理過程步驟多,每個環節皆不能出錯,發展更需要緊貼市場步伐;成功,一點也不簡單。

採訪、撰文:許鎮邦 攝影:黃俊耀、受訪者提供

放大圖片 / 顯示原圖

放大圖片 / 顯示原圖

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads