虎豹樂圃李明哲妙韻活化古蹟
鋼琴家轉型藝術行政扶持本港音樂人才

位於港島大坑的一級歷史建築「虎豹別墅」，2019年完成活化後，變身音樂教育及表演平台「虎豹樂圃」，惟受新冠疫情影響，樂圃自本年1月起關閉，今天（16日）正式重開，項目總舵手、虎豹樂圃執行董事（樂圃策劃）李明哲（Sheryl）對未來發展雄心壯志；本身為知名鋼琴家的她，早年選擇「轉跑道」從事藝術行政，由台前走到幕後，多年來不變的是對音樂行業那份熱誠。

Sheryl母親簡坤凝是著名鋼琴家兼幼兒音樂教育家，大概是遺傳優良基因，Sheryl從小展現音樂才華，4歲學鋼琴，小六已考獲8級，在當年算甚快。小學與初中均就讀跑馬地瑪利曼的李明哲，音樂成績突出，母親見女兒有天份，初中送她到美國進修音樂，其後曾往英國、德國等地深造，跟隨頂級鋼琴名師學藝，13歲起已在全球多個大型舞台演出，並於國際比賽中獲獎無數。

年幼成名錯失青春經歷

現今很多望子成龍的家長，往往要求子女3、4年班便考到鋼琴8級，惟身為過來人的Sheryl認為，過分催谷非好事，「用自己做例子，嗰個年代算係比較早去外國深造音樂，我18歲未入大學，已經喺美加、歐洲表演過，比賽又有唔錯成績；到讀大學時，身邊好多同學先啱啱開始想讀音樂，我好似已經做晒所有嘢。」

年少成名，背後付出代價不小，「睇返轉頭，好似miss咗中學同朋友仔出去玩、傾電話嘅時間，當年就係返學、放學同練琴；有啲大家覺得好平常嘅娛樂，例如踩單車、打牌，我近年先開始接觸，因為要練琴吖嘛！所以大學有段時期，直情覺得鋼琴『懨悶』，甚至有啲討厭。」

留美期間，Sheryl有機會到不同畫廊、博物館參觀，大開眼界，「發現個世界唔係得四幅牆同黑白琴鍵，藝術亦唔只音樂同鋼琴，開始explore（探索）唔同嘅嘢，好似聽音樂會、睇芭蕾舞。」接觸不同藝術多了，啟發她決定轉型，進軍藝術行政管理領域，「雖然嗰陣仲有同好多演奏家合作演出，但已經知將來唔想行『演奏家』條路，太辛苦。」

在耶魯大學完成學士課程後，她到美國紐約大學讀碩士，進修音樂管理、音樂法律等，畢業後於當地一間古典音樂出版社工作，負責行政管理，一做3年多，「不過我從來無放棄鋼琴，喺唔同學校都有教（琴），過程中對音樂了解多咗，始終你要講解畀學生聽，同自己演奏好唔同。」

先做顧問後加盟當舵手

2009年Sheryl應本地文化界朋友邀請，回港加入香港小交響樂團，主要策劃室內樂（chamber music）表演項目及行政工作。在外國多年的她直言初時很不習慣，「以開會為例，以前喺外國我會大膽啲表達意見，唔係話駁嘴，起碼會講內心諗法；返到香港好多時見同事未必敢出聲，我一出聲，佢哋覺得『你個鬼妹仔性格真係會challenge（挑戰）老細喎』，其實唔係challenge，只不過好奇想問清楚。」

2011年，她轉職古典音樂品牌公司Naxos任管理，時值唱片業式微，又是另一番體會，「當時係CD（鐳射唱片）嘅尾聲，我哋做好多LP（Long-Playing，黑膠唱片別稱）、Hi-Fi方面音樂，我要睇埋東南亞市場，你知內地當年仲係周街翻版（唱片），點控制版權、提高市場（知識產權）意識？點樣將音樂變成電子版？我對嗰方面比較有興趣，同埋每個國家情況唔同，係有趣嘅經驗。」

其後Sheryl由音樂家化身創業家，開設音樂顧問公司，因緣際會認識虎豹音樂基金，當時基金及胡文虎慈善基金會獲政府活化歷史建築夥伴計劃支持，把虎豹別墅變成虎豹樂圃，目標成為本地中西音樂教育表演平台，「一來食正我音樂呢瓣，加埋呢個咁獨特嘅地方，我跟基金啲人嚟睇場已經對項目好有興趣。」

她解釋，樂圃適合推廣室內樂，因樓底夠高，有助音樂悠揚繚繞，而且木地板可強化演奏時的音色，加上環境幽雅，更易讓人沉醉於音樂。早期她以顧問角色為項目提供意見，至樂圃活化工程完成後，2018年正式加盟。

疫下活用科技矢志眾樂樂

惟Sheryl補充，雖然場地環境足以媲美外國專業音樂學院，可是也有「先天性缺陷」要克服，「（別墅）1936年起嗰陣無冷氣無升降機，很多配套要加設去符合而家標準，例如方便傷殘人士出入嘅設施；同埋我哋喺正渣甸山山腳，下低係大坑，一落雨就好濕，仲要係木地板同有咁多樂器，故此要長期開抽濕機同風扇吹住；另外，隔音方面要做到好足，呢啲都唔易應付。」

樂圃2019年4月投入營運，先後遇上社會運動及新冠疫情，可有生不逢時之嘆？Sheryl不諱言，「有少少，尤其疫情以來（樂圃）又開又閂，連正式開幕典禮都未做過」，惟她始終保持積極心態，「我哋趁呢個（疫情）機會不斷學習，樂圃嚟到第四年，之後方向會加埋technology（科技），好似閉館期間，啲老師都有keep住網課、搞網上音樂節，未來一定會繼續嘗試。」

「世界不停往前走，我哋做音樂、保育都係，我好好彩，喺外國生活咁多年，由台前演奏去到幕後行政，睇咗、學咗好多嘢；而自己喺香港出世，覺得點都有種使命感，想幫香港喺藝術文化方面貢獻返一份力量。香港有好多有才華嘅音樂人才，未必人人有機會更進一步，我希望可以扶佢哋一把。」Sheryl如是說。

音樂與藝術沒疆界之分，既可獨樂樂，也能眾樂樂；然而無論處於哪個位置、透過什麼形式，總會給生活帶來色彩。

採訪、撰文：許鎮邦攝影：黃俊耀、受訪者提供

虎豹樂圃部分活動