熱門:

2021年7月9日

達聞西 競技研究院

闔家歡

英格蘭史上首次殺入歐國盃決賽,除咗英格蘭球迷最開心,香港人都表示寧舍開心!唔使問點解啦下話!近日球迷界又興起「It is coming home」嘅爭議,到底英國球迷係指迎接獎盃回歸,定係純粹自嘲呢?

呢個名句來自1996年歐國盃英軍嘅打氣歌Three Lions,本身有兩個含義,一個指大賽回歸英倫主辦,另一含義係嘲諷英軍唔爭氣,自1966年世界盃之後就未贏過大賽。直到2018世盃決賽周殺入四強,球迷先再次大叫:「足球回家!」

當時英格蘭球迷真係覺得有機會捧盃,可以將世界盃帶返屋企,結果引來克羅地亞球星莫迪歷反感,覺得英格蘭上下太自大!名宿連尼加就澄清「回家」係自嘲,絕無自大嘅意思,仲笑他國球迷唔了解歌詞同埋英式幽默!

達聞西就唔多接受連尼加嘅解釋,唔好唔記得佢係四強不敵克羅地亞後先澄清,如果當時英軍殺入決賽撼法國,你估佢會唔會咁講吖啦?實一路高歌:「It is coming home」啦!呢啲咪叫輸打贏要,跌落地揦返拃沙囉!

歌詞還歌詞,球迷點解引用嗰句呢?就要睇返當時嘅背景同心態,點可以立亂搬龍門呢?就好似呢次打入歐國盃決賽,唔通又係自嘲表現差啊?心嗰句梗係話:呢次9成9捧到盃嘞啩!身為英格蘭球迷嘅你,捫心自問係咪咁諗先?

英國解封

講真獎盃在前士氣決心行先,何況英軍有天時地利人和,周三場波就有64950名球迷入場,個個球迷都唔使戴口罩,又冇所謂社交距離。達聞西隔住個電視熒幕,都感受到嗰陣自由自在睇波嘅味道!仲有啊!英國7月19日就正式解封。

所以話,面對世紀疫情最重要唔係強行封城同自覺防疫,後者喺初期當然好緊要啦!不過,仲要有嚮往回復正常生活嘅決心,咁先可以快快趣研究出可靠疫苗。如果齋靠強硬手段同自我犧牲嘅精神,對疫苗研究反而唔太有利。

達聞西真心希望英格蘭可以贏返次大賽冠軍,亦希望香港人盡快除口罩,好似英國咁無時無刻呼吸新鮮空氣。如果打疫苗嘅目的係唔使再戴口罩,相信好多香港人都願意打㗎!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads