熱門:

2021年6月30日

達聞西 競技研究院

烏龍射手王!

最危險嘅地方,就係最安全嘅地方;最可怕嘅射手,並唔係C朗同麥巴比,而係自己或豬隊友。歐國盃截至周一,排射手榜首席嘅唔係入5球嘅C朗,而係入咗9球嘅Own Goal——烏龍波啦!

之前15屆歐國盃加加埋埋得9個烏龍波,第一球來自1976年嘅捷克球員安祖斯,上屆法國決賽周就有3個烏龍波。勢估唔到今年來個大爆發,9位烏龍王之中包括德國老將曉姆斯,而葡萄牙對德國場波更炮製兩個烏龍波。

戰術引致失誤

好多陰謀論話係假波,達聞西覺得關戰術進化嘅事,好似禮拜一西班牙5比3贏克羅地亞,狂牛門將烏尼西蒙接應柏迪回傳,竟然漏咗個波入龍門。當今足球注重控球在腳,要求門將無時無刻準備迎波,稍一分神就出事。

柏迪來自巴塞青訓學校,場上11人都係控球高手,但佢唔記得烏尼西蒙來自畢爾包,加上個波太大力兼落咗西,一落地就唧走咗。咁重要嘅比賽,烏尼西蒙竟然連累柏迪擺烏龍,唔大受打擊就假啦!

不過,狂牛門神甩漏經驗夠豐富,後備門將迪基亞更加係專家級,於是半場上前安慰烏尼西蒙,細心聽取對方解釋,再以過來人身份安撫。果然烏尼西蒙下半場屢次神救,協助西班牙淘汰克羅地亞。

教練安歷基都大讚烏尼西蒙夠堅強,「足球有時就係犯錯嘅運動,烏尼西蒙用表現反擊嘲諷佢嘅人。」後衞艾斯派古達都話:「球員都係人,人都會犯錯,佢用神救嚟彌補過錯,你點樣怪責佢呢?」

人誰無錯呢?換緊血嘅狂牛兵團,難免會特別多。好似中鋒艾華路莫拉達都屢失戎機,對克羅地亞又試過門前頂中後衞,搞到雙方打成3比3踢加時,不過100分鐘冷靜右腳控定再起左腳抽入。

莫拉達今屆入咗兩球波,歷屆入5球追平費蘭度托利斯嘅紀錄。不過,西班牙球迷認真苛刻,不斷喺網上恐嚇佢同家人:「佢哋咒我個仔死,太太同個仔入場都受盡謾罵!我簡直唔敢睇手機,我真係希望佢哋學識設身處地!」

達聞西最痛恨呢類網上暴民,同埋入場問候人全家嘅勝利球迷,有本事你着西班牙波衫落場吖!大賽當前都唔識得槍口對外,改名叫烏龍球迷好過啦!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads