熱門:

2021年6月10日

達聞西 競技研究院

低調做人 高調做事

歐國盃開波在即,主辦國之一嘅英格蘭最受香港球迷歡迎,除咗大家都係睇英國波大之外,亦都緬懷殖民地時代嘅自由生活。記得1996年英格蘭歐國盃嗰個夏天,英軍仲特登嚟香港打熱身賽,達聞西當年嗌到喉嚨發炎咁滯。

嗰屆英軍最終四強互射十二碼不敵德國,最出位係29歲就未老先衰嘅加斯居尼,呢個肥仔嘜染一頭金髮,打出繼1990年世界盃後嘅代表作,之後就喺酒精、女人、醜聞中消逝。也許,光輝係唔會永恆,但起碼永遠留在球迷心中。

今屆英軍嘅新星係曼城21歲中場菲爾科頓,皆因日前染咗個加斯居尼頭,話係向前輩英雄致敬,認真識得搶fo呃點擊!多蒙特小將查頓辛祖同維拉隊長基亞利殊,一時間都變咗配角。

雖然科頓2000年先出世,但佢好崇拜加斯居尼,「我有睇佢96歐國盃嘅精華!簡直令人難以置信,佢對成個英格蘭意義非凡,如果我可以發揮佢當年嘅作用,咁就好啦!」呢位新仔舊年酒店偷會冰島美女,百厭程度毫不輸蝕!

科頓染髮搶fo

大賽係英雄地,邊個交到差就上位,達聞西都好期待究竟邊個可以跑出,成為下一個加斯居尼、舒利亞。不過,有樣嘢要提提科頓,通常賽前太過高調,太過要做英雄,最後都冇咩好結果,因為大家都睇住你吖嘛!

有句說話叫:低調做人,高調做事。即係話平時要低低調調,到落場嘅時候要一鳴驚人。你知啦!呢個呃like搶點擊率嘅時代,個個都語不驚人誓不休,將自己煲到絕世天才咁,結果咪又係搵窿捐?

加斯居尼都知道科頓想學自己,佢老人家都好欣慰,不過有以下建議:「佢好唔錯啊!一定會紅。不過落場要再貪心啲同積極啲!」意思係唔好整色整水,落場用表現證明自己,白啲講:唔好得把口!

科頓把口幾吹得㗎,直頭話英軍有機會贏冠軍添!「我、美臣蒙特、史達寧、列斯占士都打入歐聯決賽,可見今年大家都好高水準,有我哋呢班球員在陣,我覺得只要全程投入,有機會贏到歐國盃!」好多讀者同達聞西一樣,聽到心花怒放,好似獎盃就在眼前!咁就祝科頓同英軍順順利利,贏到首個歐國盃冠軍啦!

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads