熱門:

2021年4月30日

達聞西 競技研究院

九流二五仔

《無間道》入邊嘅古惑仔儍強,教大家點樣辨別二五仔:「當嗰個人做緊一樣嘢,但又好唔專心咁望住你,嗰個就係差人。」呢啲係講緊職業臥底,現實生活就好多九流二五仔,皇家馬德里門將泰拔高圖爾斯就屬於呢類。

達聞西聽過一位喺日本嘅間諜講,做間諜先決條件係平民樣,行女人街唔會畀人望就啱晒!牛高馬大嘅高圖爾斯明顯唔係合適人選。呢位28歲門神又好鬼老實不客氣,2011年効力馬體會居然偷食國家隊隊友迪布尼嘅前女友。

車仔球迷憎死佢

雖然當時都係少年十五二十時,亦係男未婚女未嫁,但高圖爾斯衰到爆畀迪布尼一名朋友知,可憐曼城球星20歲就戴咗綠帽!好彩,迪布尼冇留下陰影,仲結咗婚有3個仔女添!高圖爾斯就依然保持玩家本色,幾年前拋棄前女友同一對子女。

情場二五仔,球場又點會唔同?2018年夏天為落車上馬居然拒絕歸隊。一着上皇馬波衫就踩車仔:「真係唔同level,身邊都係頂級球星……望上班拿比奴球場見到嘅係人海,以前?見到史丹福橋周圍嘅高樓大廈啊!」

哦,即係嫌棄車仔球場又矮又寒酸啦!所以話,車仔球迷點會唔憎死佢啊!歐聯四強首回合作客1比1完場,高圖爾斯上前想同舊東家握手,點知車仔領隊杜曹當佢透明,好似驚整污糟自己對手咁,車仔球迷不知幾開心!

隔一日又有影片流出,原來高圖爾斯又展現二五仔本色。大家都知車仔前鋒迪姆雲拿上半場門前4碼射唔入,呢位門神半場喺球員通道同基奧特細聲講大聲笑,佢仲伸埋腳咁講:「我係咁意伸下隻腳就救到啦!」

你叻,你至巴閉!巴閉到加盟3季贏得嗰一次西甲冠軍!高圖爾斯點睇都算球隊支柱啊,做咩成日犯錯兼失波呢?知唔知皇馬球迷幾後悔放走基羅拿華斯?呢位巴黎聖日耳門門將為皇馬贏3次歐聯同1次西甲冠軍。

唔係話針對高圖爾斯,同樣由車仔轉投皇馬嘅夏薩特,賽前以老友聚頭形容昔日隊友,於是落到場個個攬頭攬頸。人望高處好正常,但要學吓做人之道,留番多少面畀自己囉!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads