有則改之無則加勉

中國體育迷以前有個講法：中國隊打小球掂，打大球就唔掂，大家認為同欠缺團隊精神有關。嚟到21世紀，總算搵出另一個原因，而最大功勞係中國足球名宿范志毅，佢喺電視節目《吐槽大會》嘅一番玩笑，揭露咗「屎波」終極原因。

范大將軍其實都係照稿讀，話中國男籃屎波要靠佢呢個足球人打救，仲重複當年鬧年輕球員嘅金句：「臉都不要啦！」觀眾、球迷睇到笑哈哈，但好多籃球國手就條氣唔順，前球星王仕鵬仲寸大將軍：「足球什麼時候有資格評價籃球？」

屎波兼小氣

好多傳媒人都加入戰團，曾經評述時打鼻鼾嘅董路，竟然鬧范大將軍冇文化云云，不過字句之間充斥粗口，真係唔知邊個冇文化啦！呢種自己屎波，又唔抵得人鬧嘅文化，先係水準唔掂嘅原因，有冇聽過：有則改之、無則加勉啊？

邊個運動同球隊冇高低潮啊？最緊要係不斷追求進步，而唔係用把口反擊囉！只要對方講得有道理，就應該虛心聽意見。難為仲有籃球員話范志毅成就低，唔可以同同場嘅國籃好手周琦比。

講真，周琦喺NBA火箭隊有咩表現？如果話姚明成就高過范志毅都講得過去。范志毅當年喺英甲水晶宮表現好好，聯賽打88場入4球，艾殊利高爾見到都要叫聲佢：「大佬」，仲得到紅軍青睞添！唔係合約寫明唔准打國際賽，佢同奧雲、謝拉特做埋隊友啦！

達聞西睇番佢盃賽對利物浦場波，雖然解圍唔係幾乾淨，但面對奧雲、希斯基呢類球星，佢依然打得好有霸氣，殺得性起毫不怯場，邊似得而家啲球員茅而不勇啊！真係一蟹不如一蟹，個個月攞住幾十萬人工，就以為自己天下第一，目中無人。

面對外界嘅議論紛紛，范大將軍喺社交網站回應：「我也是第一次碰到這麼多人來告白，歡笑之餘，希望大家也多關注足球，一起把足球界的傳承重新建立起來。」聽到未啊足籃球星們？繼承姚明同范大將軍嘅成績，再試圖超越前輩啦！

當然啦！呢種球壇「玻璃心」現象，喺整個社會都存在已久，又好難要求球星們出淤泥而不染……所以話，一個社會嘅土壤係好緊要㗎！

下一篇：	留美斯
上一篇：	在家訓練要訣（上）——選項和重點

文章：

有則改之 無則加勉