使乜講啊？掂嘛！

咩叫土豪？就係欠一屁股債都要豪！當大家以為中超聯好手緊嗰陣，球隊唔再從歐洲搶貴嘢，轉而搶南韓、日職或南美球隊嘅外援，好似上海申花簽咗韓職聯嘅祖尼錫，深圳隊就從河床買到祖安昆特路。問你怕未！

中超就係咁違反常理，改改食神嘅金句：畀你班蛋散估到我，我就唔係中超啦！達聞西真係要寫個服字！好似中國足協今季實行加強版限薪、限轉會費外，再加埋個球隊「中性名」運動，禁止企業名寫落球隊名，真係雷厲風行啊！

講真，內地商人搞足球，已經係蝕住錢去搞，竟然連冠名都唔得，請足協班天才用膝頭哥諗下：唔為名唔為利，搞波嚟為乜？難怪，上季中超冠軍嘅江蘇隊（前稱江蘇蘇寧）都宣布唔玩連衞冕都費事！可見，中超冠軍係零吸引力！

當然，好多人會話：唓！好多歐洲球會都唔用企業名啦！係，冇錯，但係曼聯、利物浦個朵夠響，畀10幾億做老闆面上有光，最緊要係賺到錢吖嘛！你中超咩新鮮蘿蔔皮，同歐洲勁旅比？人哋隊隊都係百年老店金漆招牌啊！

足協口氣軟化

最好笑係，中國足協見到政策出現負面影響，眼見好多企業紛紛想縮沙，日前竟然口氣軟化，話中甲、中超嘅「準入機制」會放寬，所謂機制包括青訓、財務標準等，之前話要達到一定要求先可以參加聯賽，而家就將「紅線」向後移啦！

仲有啊！各地企業債務「爆雷」，地方球隊好難有財團贊助，於是近日又開始放風話，當地政府應該扶持足球隊，好似歐洲地方政府咁鼓勵足球產業，將球隊變成城市嘅標誌，跟住又吹咩可以振興旅遊業……又攞歐洲球壇嚟比，照下個鏡先啦！

政策五時花六時變，係內地各行業最唔穩定嘅因素，電影娛樂業、股市、樓市之前都試過，如今輪到球市都非常合情。

當然，中國足球好似扶貧攻堅戰咁，最後一定係取得全方位勝利，係窿窿罅罅零死角地贏！未來20年最大嘅潛力股，一定係中國足球。使咩講啊？掂嘛！

撰文：達聞西

下一篇：	斷纜
上一篇：	平生做盡虧心事日頭敲門心驚驚

文章：