熱門:

2020年12月28日

達聞西 競技研究院

熱刺波叔 出城求生

一朝天子一朝臣,際遇嘅嘢唔到你唔信,好似熱刺24歲球星迪利阿里咁,近5季一直係球會同國家隊靈魂人物,但睇番今季出場次數就嚇死人,聯賽打得4場加埋得74分鐘,算埋歐霸盃、英聯盃等賽事先上陣得個407分鐘,名副其實係二打六嚟。

堂堂英格蘭國腳搞到咁悲慘?咪就係同新領隊摩連奴戰術唔夾囉!佢要同班隊友打地波玩短傳,好似巴塞「Tiki-Taka」咁,但係摩帥就係打防守突擊嘅,中前場一定要參與防守,兩個人上季已經反面。結果,阿里開季14場聯賽入邊,竟然有9場唔喺球員名單!

足球場就係咁無情,摩帥直頭唔識個「情」字,只係知道哈利卡尼、孫興民都肯遷就自己,阿里你乜嘢新鮮蘿蔔皮啊?加上球隊開季成績好好,真係睬你都有味啦!班主李維斯亦好現實:阿里冇得踢唔happy?好簡單啫,搵過間球會啦!

話晒中場靈魂,熱刺咁樣對阿里,達聞西都睇唔過眼!好彩老天爺有眼,一手提拔佢嘅前熱刺領隊普捷天奴,好大機會加盟法甲豪門巴黎聖日耳門,據講佢一上台就會埋班,第一個要買嘅就係阿里同基斯甸艾歷臣兩位熱刺舊部下。

熱刺煎釀三寶

呢三位仁兄簡直係熱刺煎釀三寶,喺熱刺直頭識飛咁滯,但被炒嘅被炒、轉會嘅轉會後,分別遇上職業生涯嘅低谷,好似被人煎完再釀咁,摷晒皮、縮晒水、仲有啲燶添!如今老天開眼,巴黎聖日耳門總算聞到佢哋啲香味啦!

阿里同兩位同事都係人才,係值得擁有第二春嘅,以佢哋嘅實力可以令聖日耳門打得更漂亮,成績亦會有保證,畢竟邊個教着尼馬同麥巴比,都肯定可囊括本土錦標啦!熱刺甘心聽摩連奴老點,走去大打悶蛋贏波足球,大家即管睇下幾時有盃捧!

阿里嘅個人能力冇得彈,不過有樣嘢達聞西不吐不快,就係佢學人留髮同蓄鬍,過去青靚白淨變咗中年大叔,最弊係成個波叔咁嘅樣!上場英聯盃見到佢出場發老脾,鏡頭zoom近個大頭忍唔住笑咗,認真Sorry!

《波叔出城》系列電影笑爆肚,達聞西真係希望阿里出城去到巴黎,帶啲好波畀球迷,唔係變咗低俗笑片囉!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads