熱門:

2020年12月8日

達聞西 競技研究院

孫拿度與武球王

外號「孫拿度」嘅熱刺球星孫興民繼續發威,禮拜日英超主場2比0擊敗阿仙奴場波,先個人表演禁區外遠射彎入遠柱,再助攻前鋒拍檔哈利卡尼入波,可以講一己之力左右大局,幫助熱刺繼續排喺英超榜首之位。

當大家為孫拿度拍掌之際,內地傳媒就大力報道「武球王」武磊,搞到好似兩大亞洲球星互相輝映咁款,稍為睇真啲就知得啖笑。武磊効力嘅愛斯賓奴冇錯都係排榜首,不過就係西乙嘅第一位囉。

孫拿度已經晉身世界十大前鋒之列,今季暫時以10球排聯賽射手榜第二位,比隊長哈利卡尼仲多兩球!最得人驚係起腳16次就入咁多波,入球率高達63%,射門命中率亦有81%,兩項數據都係英超「一哥」!

偉大足球強國嘅代表武球王呢?引用內地網站嘅報道,佢周日對希杭後備上陣有個入波同助攻,之不過賽前成85日都冇入過波,認真係久旱逢甘露,或者係「百年一遇」嘅成就,幾歹都要煲大啲。

孫係亞洲之光

記得愛斯賓奴上季降班嗰陣,內地傳媒吹到英超隊排隊要佢,點知呢位中華好兒女冇跳船,寧願同球隊共落西乙咁話!睇到呢啲報道,眼淺啲都喊到收唔到聲。之不過,今季武球王點解正選都冇嘅?

原來,武球王揭幕戰對阿爾巴塞特入一球後一路冇貨交,教練畀多4場正選機會都冇起色,之後4輪因傷無緣大名單, 11月初復出就一路做後備,到上月底先有番正選,不過禮拜日又坐咗去後備席。

咁好前鋒唔一定要打正選嘅,好似車路士後備前鋒基奧特咁,不過武球王有波入就把口唔收,賽後自吹自擂話西乙水準高,其他對手都對愛斯賓奴作針對性部署。係咪想話自己入波嘅含金量高啊?

呢啲咪輸打贏要囉!比賽緊係要部署㗎啦!武球王真係要學下孫拿度,人家貴為世界前10射手,落到場上上落落幾勤力,仲幾乎個個禮拜都有靚入波。好唔好波睇外界評價,唔係靠自己把口嘅!

武球王眨下眼都29歲,內地球壇興改細個年齡,今年分分鐘三張幾嘢,中華民族嘅偉大足球復興夢,睇嚟都要等多唔知幾多個十年啦!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads